मेरिल्याण्ड
अमेरिकाको मेरिल्याण्ड राज्यस्थित एउटा घर भित्र एक मृत ब्यक्तिको साथमा १ सय २४ वटा जिउँदा सर्पहरु पालेको अवस्थामा फेला परेका छन् । पालिएका १ सय २४ वटा सर्पहरु मध्ये कतिपय कानुनले वर्जित गरेका विषालु सर्पहरु समेत रहेका छन् । सर्पहरुलाई अत्यन्त राम्रोसँग पिंजडा भित्र राखेर पालिएको राज्यका अधिकारीहरुले संचार माध्यमहरुलाई बताएका छन् । गत बुधबार छिमेकीहरुको अनुरोधमा राज्यका अधिकारीहरुले घर जाँच गर्दा मृत ब्यक्ति र सर्पहरु फेला परेका हुन । पालिएका ति सबै सर्पहरुलाई जनाबर बिज्ञहरुले बिहीबार उद्धार गरेर निकालेका छन् ।
ति १ सय २४ वटा सर्पहरुमा रेटल स्नेक्स, कोब्रा, ब्ल्याक मम्बाज लगायत १४ फिट लम्बाईको जात नखुलेको सर्प समेत भेटिएको मेरिल्याण्डस्थित अधिकारीहरुले जनाएका छन । मेरिल्याण्ड राज्यको चार्ल्स काउन्टीस्थित एक घर भित्र त्यति ठुलो संख्यामा गैर कानुनीरुपमा सर्प पालन गरिएको कुरा छर छिमेक र टोलबासी समेत अनभिज्ञ भएको बताईएको छ भने सर्पहरुलाई सुरक्षित रुपमा उद्धार गरेर स्थानान्नतरण गरिएको हुँदा सुरक्षा खतरा नभएको जनाईएको छ । सर्प पालक ति ब्यक्तिको मृत्युको कारण हालसम्म नखुले पनि जनावरले टोकेर वा बाह्य आक्रमणबाट भने भए जस्तो नदेखिएको बिभिन्न सरकारी अधिकारीहरुको हवाला दिदै संचार माध्यमहरुले जनाएका छन् ।