काठमाडौं । शुक्रबार विभिन्न पाँच मुलुकबाट नेपालीको उद्दार हुने भएको छ । विदेशमा समस्यामा रहेका, बेखर्ची बनेका र रोजगार गुमाएका नेपालीलार्य प्राथमिकताका साथ उद्दार भइरहेको छ । सोहीक्रममा शुक्रबार पाँच वटा मुलुकबाट नेपालीको उद्दार हुन लागेको हो । शुक्रबार साउदी अरेविया, यूएई, कुवेत, कतार र माल्दिभ्सबाट नेपालीलाई घर ल्याउने कार्यक्रम रहेको छ ।
हरेक मुलुकबाट एक एक उडान तय भएका छन् । विहीबार साँझ यूएई उडेको नेपाल एयरलान्सले १४८ नेपालीलाई बोकेर आउनेछ । यस उडानमा अधिकांश गर्भवती महिला रहेको बताइएको छ । यो जहाजमा एउटा शव पनि नेपाल ल्याउन लागिएको छ ।
शुक्रबार नै हिमालय एयरले साउदीबाट १८० जना नेपालीलाई काठमाडौं ल्याउनेछ । हिमालय एअरलाइन्सको जहाज पनि बिहीबार साउदी उडेको हो । माल्दिभ्सबाट शुक्रबार १५० जना नेपाली घर आउनेछन् ।
कुवेत र कतारबाट पनि नेपाली आउने तय भएको छ । यद्दपी कति संख्यामा आउनेछन् भन्ने चाँही खुलेको छैन । अहिले धमाधम विदेशबाट नेपाली नागरिकको उद्दारको काम जारी रहेको छ ।