काठमाडौं । तल्लो अरुण जलविद्युत आयोजनाको निर्माणको जिम्मा भारतीय कम्पनीले पाएको छ । शुक्रबार प्रधानमन्त्री निवास बालुवाटारमा बसेको लगानी बोर्डको ४६ औं बैठकले ६७९ मेगावाट क्षमताको तल्लो अरुण जलविद्युत् आयोजना सतलज विद्युत निगम (एसजेभीएन) लाई दिने निर्णय गरेको छ ।
यो कम्पनी भारत केन्द्र सरकार र भारतको हिमाञ्चल प्रदेश सरकारको संयुक्त लगानी स्थापना भएको हो । प्रधानमन्त्री केपी शर्मा ओलीको अध्यक्षतामा बसेको बोर्ड बैठकले सार्वजनिक निजी साझेदारी मोडल अन्तरगत (निर्माण, स्वामित्व, सञ्चालन र हस्तान्तरण (बुट) मोडलमा निर्माण गर्न सतलजलाई छनोट गरेको हो ।
नेपालसँग भारतले लामो समयदेखि यो कम्पनीको माग गरिरहेको थियो ।सतलज विद्युत् निगमले भने अहिले अरुण तेस्रो जलविद्युत् आयोजना निर्माण गरिरहेको छ। सतलज विद्युत निगमले अरुण तेस्रो जलविद्युत आयोजना निर्माणमा भने ‘एसजेभीएन नेपाल’ नामक कम्पनी दर्ता गरेर काम गर्नेछ ।