काठमाडौं । सरकारले पश्चिम रुकुमस्थित चौरजहारीको सोतीमा भएको घटनामा हत्या भएका व्यक्तिका परिवारलाई १०\१० लाख रुपैयाँ प्रदान गर्ने भएको छ । मन्त्रिपरिषद्को बैठकले यस्तो निर्णय गरेको हो । जेठ १० मा यो घटना भएको थियो घटनामा ६ जना मारिएका थिए । हत्या भएकाहरुका परिवारलाई सरकारले प्रतिव्यक्ति १० लाख रुपैयाँ उपलब्ध गराउने निर्णय गरेको अर्थमन्त्री डा. युवराज खतिवडाले जानकारी दिए । मृतकका परिवारलाई आर्थिक सहायता र घाइतेहरुको उपचार गर्ने निर्णय भएको उनले जानकारी दिए ।
घटनामा जाजरकोट भेरी नगरपालिका–४ का २१ वर्षीय नवराज विक, सन्जु विक, गणेश बुढा, भेरी नगरपालिका–११ का लोकेन्द्र सुनार र चौरजहारीका टीकाराम सुनार र भेरी नगरपालिका वडानम्बर ११ का गोविन्द शाहीको हत्या भएको थियो । अन्य १२ जना घाइते भएका थिए । दलित समुदायका नवराजले चौरजहारीमा मल्ल ठकुरी थरकी केटीलाई भगाउन गएको समयमा यो घटना भएको हो । यो घटना नियोजित भएको निष्कर्षमा अनुसन्धानहरु पुगेका छन् । घटनामा संलग्न रहेका २३ जना अभियुक्त पूर्पक्षका लागि थुनामा रहेका छन् ।