वासिंटन डिसी । अमेरिकी राष्ट्रपति जो बाइडेनले रुसी साइवर हमलाकर्तामाथि कारवाही हुने बताएका छन् । ह्वाइट हाउसका तर्फबाट जारी एक बयानमा उनले रूसका राष्ट्रपतिलाई अमेरिकामाथि साइवर हमला रोक्न आग्रह गरेका छन् । रुसले नरोके अमेरिका आफैले कारवाही गर्ने उनको चेतावनी छ । रूसका राष्ट्रपति भ्लादिमिर पुटीन र बाइडेनबीचको फोनवार्तापछि ह्वाइट हाउसले यस्तो वयान जारी गरेको हो ।
बाइडेनले आफुले हमलाकारीमाथि कारवाही गर्ने बताएपछि रुसी राष्ट्रपतिले मन्जुरी दिएको बयान ह्वाइट हाउसले दिएको अमेरिकी संचारमाध्यमले लेखेका छन् । उता मस्कोले भने यो बयानको खण्डन गरेको छ ।
शुक्रवार राष्ट्रपति जो बाइडेनले रुसी समकक्षीसँग करीव एक घण्टा फोनवार्ता गरेका थिए । पछिल्लो केही समययता अमेरिकी कम्पनीहरुमा साइवर हमला भइरहेको छ । यसमा रुसी ह्याकरको हात रहेको आरोप अमेरिकाले लगाइरहेको छ । यसै महिना एकै पटक २ सय आइटी कम्पनीमाथि साइबर हमला भएको थियो ।