काठमाडौं । नेपालमा सुनको मूल्यले अर्को कीर्तिमान बनाएको छ । बजारमा छापावल सुनको मूल्य इतिहासकै महङ्गो भएको हो ।
आइतबार एकै दिन सुन १२ सय रुपैयाँले बढ्यो । यससँगै सुनको भाउ ७२ हजार ५ सय रुपैयाँ पुगेको नेपाल सुनचाँदी व्यवसायी महासंघले जानकारी दिएको छ ।
यसअघि सुनको मूल्य ७१ हजार ५ सय रुपैयाँ रहेको थियो । उक्त कीर्तिमान आइतबार तोडिएको हो ।
तेजाबी सुन भने प्रतितोला ७२ हजार २ सय रुपैयाँमा कारोबार भएको छ । चाँदीको मूल्य प्रतितोला ८ सय ५० रुपैयाँ पुगेको महासंघले उल्लेख गरेको छ ।
सुनको मूल्य ह्वात्तै बढेपछि बजारमा सुनको कारोबार ठप्प छ । सुन बैंकमा गएर थुप्रिएको छ ।
नजिकिएको तीजमा पनि उपभोक्ताले सुनको वास्ता गरिरहेका छैनन् । किनकी बजारमा छोइनसक्नु भाउले नेपालीलाई सुन निकै परको वस्तु बनाइसकेको छ ।
बिक्रि नै हुन नसकेपछि बैंकहरुबाट पनि सुनको आयात रोकिएको छ । बैंकहरुमा अहिले करीव ८ सय किलो सुन थुप्रिएर बसेको छ ।