चितवन । कोरोना भाइरसको महामारीका कारण रोकिएको सौराहाको जंगल सफारी खुला भएको छ । विगत तीन महिनादेखि सवारी साधन वा हात्तिमार्फत गरिने सफारी बन्द थियो । चितवनको सौराहाका सामुदायिक वनमा पर्यटकको घुमफिरको एक आकर्षण जंगल सफारी समेत हो । महामारीको दोस्रो लहर आएपछि १६ वैशाखबाट सफारी बन्द गरिएको थियो । मङ्गलबार सफारी सूचारु भएको चितवन राष्ट्रिय निकुञ्जले जनाएको छ । अब हात्ती सफारी, जिप सफारी र डुङ्गा सयर गर्न सकिने भएको छ ।
सौराहामा बीस हजारी तालसहित पर्या-पर्यटन सञ्चालन गरिरहेका बाघमारा मध्यवर्ती सामुदायिक वन, जनकौली मध्यवर्ती सामुदायिक वन, चित्रसेन मध्यवर्ती सामुदायिक वन र खैरहनीको कुमरोज सामुदायिक वनमा हात्ती सफारी, जिप सफारी र डुङ्गा सयर गर्न सकिन्छ । सौराहा भने १ साउनबाट खुलेको हो । यहाँका होटेल तथा रिर्सोटले ३३ प्रतिशत मात्र पर्यटक राख्न पाउँछन् । अवस्था सामान्य भएपछि भने निकुञ्ज प्रवेश समेत खुला गर्ने तयारी छ । यसअघि पोखरामा डुंगा शयर खुला भएको थियो ।