बिष्णु सिंह, न्युयोर्क।
गत मे ४ मा अन्तर्राष्ट्रिय नेपाली साहित्य समाज (अनेसास ) न्यूयोर्क च्याप्टरले नेपाली नयाँ बर्ष बिक्रम सम्बत २०८१ को शुभकामना आदान-प्रदान कार्यक्रम आयोजना गर्यो। कार्यक्रममा साहित्यकार कुन्ती थापाद्वारा लिखित “ फेसबुकको मान्छे” उपन्यासको छोटो समिक्षा र परिचय पनि गर्यो । कार्यक्रमको शुरुवात सभापतिको आसन ग्रहण गर्न अध्यक्ष लक्ष्मी श्रेष्ठ तथा भूपू अध्यक्ष ज्योति पौडेल र उपन्यासकार कुन्ती थापालाइ ड्यासमा निम्त्याईयो। पछि कार्यक्रममा ढिलो आईपुगेका भूपू अध्यक्ष राजेन्द्र श्रेष्ठलाई पनि ड्यासमा बसाईएको थियो।
तत्पश्चात च्याप्टरका महासचिव नदिया लिबांगले सम्पूर्ण अतिथिहरुलाई स्वागत गर्दै आ-आफ्नो स्थानमा आशन ग्रहण गराउनु भयो।
यसैगरी च्याप्टरका कोषाध्यक्ष सृजना लामा र अन्य सदस्यले कार्यक्रमका सभापति, प्रमुख अतिथि तथा बिशेष अतिथिहरुलाई दोसल्ला ओढाएर सम्मान गर्नु भएको थियो। अनि प्रमूख अतिथि र बिशेष अतिथिहरुले पानसमा दियो प्रज्वलन गरी औपचारिक रुपमा कार्यक्रमलाई अघि बढाउनु भयो। उक्त अवसरमा नेपाल र अमेरिकी राष्ट्रिय गान पनि गाईएको थियो।
तत्पश्चात बिभिन्न सहभागीहरुले नव बर्षको शुभकामना मन्तब्य दिन शुरु गरियो।
शुभकाना मन्तब्य दिने क्रममा कवि-कवियित्रीहरु बिकास बिष्ट, संजय थापा, कमला प्रसाई, शकुन्तला ज्ञवाली, पुनम काफले लगायतले छोटो कविता प्रस्तुत गर्दै शुभकामना दिएका थिए।
शुभकामना दिने क्रममा बिष्णु सिंहले अनेसास न्युयोर्क च्याप्टरले जारी गरेको कार्यक्रमको सुचनामा सदस्यहरुलाई निम्तो गर्न छुटाएको जानकारी गराउदै अनेसास व्यवस्थापनले यस्तो त्रुटि नदोहर्याउन सतर्क हुनुपर्ने सुझाव गर्दै आफ्नो शुभकामना अर्पण गरेका थिए।
उपन्यासकार कुन्ती थापाको अनुरोधमा डा. गोबिन्द कोइरालाले “फेसबुकको मान्छे” उपन्यासको छोटो समिक्षा र परिचय गरिदिएका थिए। छोटो समयमा अनुरोध आएकोले बिस्तृत रुपमा समिक्षा गर्न नसकिएको प्रकाश पारे। साथै उपन्यासले बिबिध पक्षको समस्या पहिचान गरेको तर समाधानको पहिचान गर्न केही कमी रहेको स्पष्ट पारे। तर लेखिका कुन्ती थापाले यस उपन्यासको दोस्रो भाग चाडै नै आउँन लागेको जानकारी गराएकोले सायद त्यस खण्डमा समाधानको उपायहरु पनि पहिचान हुने अपेक्षा गर्न सकिन्छ।
लेखिका कुन्ती थापाले पनि “फेसबुकको मान्छे” उपन्यासको छोटो परिचय गरेकी थिइन्। उनले आफ्नो प्रकाशित रचनाहरु बितरण गरि आएको सहयोगबाट नेपालमा केही गरिब बालबालिकाहरुलाई अध्ययनकोलागि सहयोग पुर्याउदै आएको जानकारी गराईन। उनको यस्तो सहयोगी हृदयको सहभागीहरुले प्रशंसा गरेका थिए।
कार्यक्रममा एनआरएनए न्युयोर्क च्याप्टरका महिला उपाध्यक्ष लक्ष्मी थापा लगायत बिश्व थापा, शारदा क्षेत्री अन्य गण्यमान्य व्यक्तित्वहरुको उपस्थिति थियो । तर समग्रमा उपस्थित सहभागीहरुलाई हेर्दा ९५ प्रतिशत महिला र ५ प्रतिशत मात्र पुरुष देखिन्थे। निम्तो नपाएर हो कि निम्तोमा त्रुटी भएर हो, त्यसको अनुसन्धान व्यवस्थापनले गर्नुपर्ने देखिन्छ।
अन्त्यमा अध्यक्ष लक्ष्मी श्रेष्ठज्युले उपस्थित सम्पूर्ण अतिथिज्युहरुलाई धन्यबाद मन्तब्य ब्यक्त गर्दै कार्यक्रमको समापन भएको घोषणा गर्नु भएको थियो।