काठमाडौं । अमेरिकाले कोरोना भाइरसविरुद्धको दोस्रो खोपलाई समेत प्रयोगको अनुमति दिएको छ। कोरोना खोप अध्ययन गर्न बनेको विज्ञहरुको टोलीले मोडर्ना खोपलाई तत्काल प्रयोग गर्न सकिने गरी खाद्य तथा औषधि प्रशासन एफडीएलाई अनुमति प्रदान गरेको हो।
मोर्डना खोपलाई विज्ञहरुको समूहले अनुमति दिएपछि अमेरिकाले अब एक साता पछि दोस्रो खेप समेत प्रयोगमा ल्याउन पाउने भएको छ । यसअघि बेलायती कम्पनी फाइजर बायोएनटेकले अमेरिकामा बनाएको खोपले अनुमति पाई प्रयोग भइरहेको छ ।
कोरोना भाइरसविरुद्ध मोर्डनाले तयार गरेको खोपलाई अनुमति दिने नदिनेबारे विज्ञहरुको टोलीमा मतदान भएको थियो । जसमा दिने पक्षमा अधिकांश सदस्यको राय थियो । अन्तराष्ट्रिय संचारमाध्यमहरुका अनुसार मोडर्नाको खोप १८ वर्ष माथिका व्यक्तिलाई मात्र दिइने छ । मोडर्ना खोप यसअघिका परीक्षणमा ९४ प्रतिशत प्रभावकारी पाइएको छ।
विज्ञको टोलीले अनुमति दिनासाथ अमेरिकाले २० करोड डोज खरिद गर्ने तयारी गरेको छ। मोडर्नाले तयार गरेको ६० लाख डोज आयातका लागि पानी जहाजमा लोड गरिसकिएको बीबीसीले उल्लेख गरेको छ । अमेरिका कोरोनाबाट सबैभन्दा बढी प्रभावित मुलुक हो । यहाँ कोरोना भाइरसबाट ३ लाख १७ हजारभन्दा बढीको मृत्यु भइसकेको छ । पौने २ करोड मानिसमा संक्रमण भएको छ।