काठमाडौं । अमेरिकी कम्पनी मोडेर्ना विकास गरेको खोप, कोरोना भाइरस (कोभिड–१९) विरुद्ध ९५ प्रतिशत प्रभावकारी रहेको सार्वजनिक भएको छ । बीबीसीका अनुसार कम्पनीले सोमबार आफ्नो नतिजा सार्वजनिक गरेको छ ।
जसअनुसार खोपको माध्यमबाट कोरोना महामारी नियन्त्रण हुने अपेक्षा गरिएको छ । यसअघि अर्को अमेरिकी कम्पनी फाइजरले आफूले विकास गरिरहेको खोप कोरोनाविरुद्ध ९० प्रतिशतभन्दा धेरै प्रभावकारी रहेको सार्वजनिक गरेको थियो । उता, रुस र भारतमा समेत कोरोनाविरुद्धको खोपको अन्तिम चरणका परीक्षणहरु भइरहेका छन् ।
मोडेर्ना कम्पनीले सोमबार आफ्नो कोरोना खोपको परीक्षणका नतिजा सार्वजनिक गर्न पाउनु खुसीको दिन भएको समेत उल्लेख गरेको छ ।
कम्पनीका अनुसार अबको केही सातामै नियामक निकाय समक्ष खोप अनुमोदन गर्न आवेदन दिने तयारी रहेको समेत कम्पनीले उल्लेख गरेको छ । मोडेर्नाले आफ्नो खोपको तेस्रो चरणको परीक्षणको क्रममा ३० हजार मानिसहरुमा परीक्षण गरेको बीबीसीले लेखेको छ ।