काठमाडौं । अमेरिकाका लागि नेपाली राजदूत श्रीधर खत्रीले अमेरिकी राष्ट्रपति जो बाइडेनसँग भेट गरेका छन् । उनीहरुबीच जेठ ३० मा भेट भएको हो । राजदूत खत्रीले अमेरिका गएपछि कोभिड–१९ संक्रमणका कारण भर्चुअल रुपमै राजदूतको ओहदाको प्रमाणपत्र बुझाएका थिए । त्यसबेला व्यक्तिगत रुपमा भेटवार्ता भएको थिएन । राष्ट्रपति बाइडेनलले भर्चुअल रुपमै ओहदाको प्रमाणपत्र बुझाएका राजदूतहरूसँग व्यक्तिगत भेटवार्ता गर्न ह्वाइट हाउसमा बोलाएका थिए ।
सोही क्रममा राजदूत खत्री र बाइडेनबीच भेट भएको हो । दूतावासले भेटबारे औपचारिक जानकारी भने सार्वजनिक गरेको छैन । छोटो भेटवार्तामा राष्ट्रपति बाइडेनले नेपालको विषयमा चासो राखेको र राष्ट्रपतिले नेपाल र नेपाली आफूलाई मन पर्ने बताएको खत्रीले प्रतिक्रिया दिएको कान्तिपुर दैनिकले समाचार प्रकाशित गरेको छ ।