Category: डायस्पोरा

काठमाडौँ, ३० असोजः प्रधानमन्त्री वालेन्द्र शाहको भारत भ्रमण आगामी मङ्सिर दोस्रो साता हुने भएको छ । परराष्ट्रमन्त्री शिशिर खनालले आज सञ्चारकर्मीहरूसँगको कुराकानीमा प्रधानमन्त्री शाहको भारत भ्रमण हुने बताउँदै मितिका सम्बन्धमा भने सार्वजनिक समाचारमा उल्लेख भएकै आसपासको मितिमा हुने उल्लेख गरे । विभिन्न सञ्चारमाध्यममा प्रधानमन्त्री शाहको भारत भ्रमण आगामी मङ्सिर दोस्रो साता हुने समाचारहरू सार्वजनिक भएका छन् । मन्त्री खनालले भने, “तर आजका दिनसम्म हामीले औपचारिक रूपमा निश्चित गरिरसकेका छ्रैनौँ ।”

वर्तमान सरकार गठन भएदेखि नै भारत सरकारसँग नियमित सम्पर्क भइरहेको जानकारी गराउँदै उनले प्रधानमन्त्रीको आगामी भ्रमण परिणाममुखी र उपलब्धिमूलक हुने आफूहरूको चाहना रहेको बताए । “भ्रमणका दौरान ‘ट्रेड र ट्रान्जिट’, कनेक्टिभिटी, ऊर्जा, सीमालगायत विषयमा केही न केही सकारात्मक प्रगती होस् भन्ने छ”, मन्त्री खनालले भने। भ्रमणका क्रममा ठूला पूर्वाधार तथा जलविद्युत् परियोजनाको उद्घाटन र शिलान्याससँगै विभिन्न सम्झौतामा हस्ताक्षर हुने बताइएको छ । गत १३ चैतमा वर्तमान सरकारको नेतृत्व सम्हालेयता प्रधानमन्त्री शाहको पहिलोपटक भारत भ्रमण हुन लागेको हो ।

दुबई । नेपाली महावाणिज्यदूतावास, दुबईले नयाँ बनेर आएका राहदानी सेवाग्राहीको ठेगानामै डेलिभरी गर्ने व्यवस्था मिलाएको छ । दूतावासले सूचना जारी गर्दै यूएईको सरकारी हुलाक सेवा इमिरेट्स पोस्टमार्फत सम्बन्धित आवेदकको ठेगानामा राहदानी पु¥याउने व्यवस्था गरिएको जनाएको हो ।
‘नयाँ बनेर आएको राहदानी लिन महावाणिज्यदूतावाससम्म आउँदा छुट्टी लिनुपर्ने, समय र यात्रा खर्च हुनेलगायतका समस्या देखाउँदै सेवाग्राहीबाट हुलाकमार्फत राहदानी डेलिभरीको अनुरोध हुँदै आएको थियो ।

सोही अनुरोधलाई सम्बोधन गर्दै दूतावासले नयाँ व्यवस्था लागू गरेको हो’, महावाणिज्यदूतावासले जनाएको छ । व्यवस्थाअनुसार राहदानी आवेदनको बायोमेट्रिक दिने समयमा सम्बन्धित आवेदकले महावाणिज्यदूतावासमा डेलिभरी फाराम भरेर बुझाउनुपर्नेछ । राहदानी बनेर आएपछि दूतावासले डेलिभरीका लागि इमिरेट्स पोस्टलाई उपलब्ध गराउनेछ ।

राहदानी डेलिभरीको समयमा सेवाग्राहीले इमिरेट्स पोस्टलाई शुल्क बुझाउनुपर्नेछ । दूतावासका अनुसार डेलिभरी शुल्क १५ दिराम र मूल्य अभिवृद्धि कर (भ्याट)सहित १५.७५ दिराम तोकिएको छ । यो सेवा स्वैच्छिक रहेको दूतावासले स्पष्ट पारेको छ । आवश्यक पर्ने सेवाग्राहीले मात्र उक्त सेवा उपयोग गर्न सक्नेछ । डेलिभरीको लागि सेवाग्राहीले महावाणिज्यदूतावासले उपलब्ध गराएको फारममा सही मोबाइल नम्बर र स्पष्ट ठेगाना टिपाउनु पर्नेछ ।

यो सेवाले दुबई र उत्तरी क्षेत्रमा रहने लाखौं नेपाली लाभान्वित हुनेछन् । करिव ७ लाख नेपाली रहेको यूएईमा दुबई र उत्तरी क्षेत्रमा करिव ५ लाख कार्यरत रहेको अनुमान छ ।

दुबई, यूएई । दुबईस्थित नेपाली महावाणिज्यदूतावासले आफ्नो सञ्चालनको पहिलो वर्षमा करिब ७५ हजार सेवाग्राहीलाई सेवा प्रदान गरेको छ । २०८२ भदौदेखि २०८३ साउनसम्मको एकवर्षे अवधिमा महावाणिज्यदूतावासले राहदानी, कन्सुलर प्रमाणीकरण, श्रमसम्बन्धी समस्या समाधान तथा अन्य सार्वजनिक सेवाका क्षेत्रमा काम गरेको हो ।

महावाणिज्यदूतावासले एक वर्षमा २२ हजार राहदानी आवेदन दर्ता तथा २१ हजार राहदानी वितरण गरेको छ । त्यस्तै, ३ हजार ८ सय एकतर्फी यात्रा अनुमतिपत्र (वन वे ट्राभल डकुमेन्ट), १३ हजार कन्सुलर प्रमाणीकरण र ५ सय पावर अफ एटर्नीसम्बन्धी सेवा प्रदान गरिएको छ ।

व्यक्तिगत भिसा प्रमाणीकरण, कम्पनी तथा भिसा प्रमाणीकरण र संस्थागत डिमान्ड प्रमाणीकरण लगायतका सेवामा समेत महावाणिज्यदूतावासले काम गरेको विवरणमा उल्लेख छ । व्यक्तिगत भिसा प्रमाणीकरण र कम्पनी तथा भिसा प्रमाणीकरणअन्तर्गत ५–५ सय तथा संस्थागत डिमाण्ड प्रमाणीकरणअन्तर्गत एक हजार सेवा प्रदान गरिएको जनाइएको छ । यीमध्ये केही तथ्यांक १० महिनाको अवधिका हुन् ।

संस्थागत डिमाण्ड परीक्षणअन्तर्गत ७ हजार, शव स्वदेश फिर्तीसम्बन्धी २ सय, नेपालका लागि पर्यटक भिसा जारी ३ सय, श्रम स्वीकृति प्रमाणीकरण ३ सय ५० र श्रम स्वीकृति पुनः प्रवेश प्रमाणीकरण तथा स्वीकृतिअन्तर्गत १ हजार २ सय सेवा प्रदान गरिएको छ ।

श्रमिकका समस्या समाधानमा प्राथमिकता
महावाणिज्यदूतावासले श्रमसम्बन्धी गुनासा, जेल, ठगी, अस्पताल, राहदानीलगायतका विषयमा फोन, इमेल, म्यासेज तथा प्रत्यक्ष भेटघाटमार्फत करिब ५ हजार मुद्दा तथा गुनासोमा काम गरेको छ । उल्लेखित संख्या अन्तिम समाधान भएका मुद्दाको संख्या नभई सेवाग्राहीका समस्या सम्बोधन गर्न गरिएको पहलको संख्या रहेको छ ।

महावाणिज्यदूतावासले प्राप्त समस्या तथा गुनासो समाधानका लागि आवश्यक पहल र प्रयास गर्दै आएको जनाएको छ । श्रमिकका समस्या तथा अन्य विषयमा दैनिक औसत २० वटा मुद्दा सम्बोधन गर्ने आधारमा वार्षिक ५ हजारभन्दा बढी केसमा काम गरिएको अनुमान छ ।

महावाणिज्यदूतावासले श्रम शिविर
१० वटा भ्रमण गर्नुका साथै दुईवटा जनचेतनामूलक कार्यक्रम आयोजना गरेको विवरणमा उल्लेख छ । क्षतिपूर्ति रकमको खातामा ८९ हजार २७०.५६ दिरहम मौज्दात रहेको र ८ लाख ३७ हजार ९२३.४४ दिरहम क्षतिपूर्ति रकम नेपाल पठाइएको छ । महावाणिज्यदूतावासले आर्थिक कूटनीतिसम्बन्धी १० वटा कार्यक्रम आयोजना गरेको छ भने कूटनीतिक भेटघाट, अन्तरक्रिया तथा पहुँच विस्तारका २० वटा गतिविधि सञ्चालन गरेको छ ।

डिजिटल माध्यमबाट दैनिक दुई सय प्रतिक्रिया
महावाणिज्यदूतावासले इमेल, ह्वाट्सएप र मेसेन्जरमार्फत सर्वसाधारणका प्रश्न तथा जिज्ञासाको जवाफ दिँदै आएको छ । त्यस्ता माध्यमबाट दैनिक औसत २ सय प्रतिक्रिया दिने गरिएको छ । महावाणिज्यदूतावासले महिनामा २० कार्यदिनका आधारमा वार्षिक ७२ हजार प्रतिक्रियाको अनुमान प्रस्तुत गरेको छ । सप्ताहन्त र सार्वजनिक बिदाका दिनमा समेत प्रतिक्रिया दिइने भएकाले वार्षिक संख्या करिब ८० हजार पुग्न सक्ने महावाणिज्यदूतावासले जनाएको छ ।

महावाणिज्यदूतावासमा सेवा लिएका सेवाग्राहीबाट २ सय २० भन्दा बढी गुगल रिभ्यु प्राप्त भएको जनाइएको छ । तीमध्ये अधिकांश सकारात्मक र उत्साहजनक रहेको तथा गुगल रिभ्यु स्कोर ४.७ रहेको छ । महावाणिज्यदूतावासले पहिलो वर्षमा करिब ५० हजार शुल्क तिर्ने सेवाग्राहीले प्रत्यक्ष सेवा लिएको अनुमान गरेको छ । यसबाहेक विभिन्न काम तथा जिज्ञासाका लागि शुल्क नतिर्ने सेवाग्राहीको संख्या त्यसको आधा रहेको अनुमानसहित पहिलो वर्षमा महावाणिज्यदूतावासमा आउने कुल सेवाग्राहीको संख्या करिब ७५ हजार पुगेको महावाणिज्यदूतावासले जनाएको छ ।

महावाणिज्यदूतावासमा संविधान दिवस तथा राष्ट्रिय दिवस कार्यक्रम
यूएई । संयुक्त अरब इमिरेट्स (यूएई)को दुबईमा रहेको नेपाली महावाणिज्यदूतावासमा नेपालको संविधान दिवस तथा राष्ट्रिय दिवस २०८३ को शुभकामना आदानप्रदान कार्यक्रम सम्पन्न भएको थियो । २०८३ असोज ३ गते संविधान दिवस तथा राष्ट्रिय दिवसको अवसरमा शुभकामना आदानप्रदान कार्यक्रम आयोजना गरिएको थियो ।

कार्यक्रममा यूएईमा क्रियाशील विभिन्न वैचारिक संस्थाका प्रतिनिधिहरु, नेपाली सामाजिक संघसंस्थाका प्रतिनिधि, सामाजिक अभियन्ता, पत्रकार, व्यवसायी तथा नेपाली समुदायको उपस्थिति रहेको थियो । कार्यक्रममा नेपाली महावाणिज्यदूतावास दुबईका महावाणिज्यदूत हरि ओडारीले नेपालको संविधान नेपाली जनताको लामो संघर्ष, त्याग, बलिदान र लोकतान्त्रिक आन्दोलनको महत्वपूर्ण उपलब्धि रहेको बताउँदै यसले नेपाललाई संघीय लोकतान्त्रिक गणतन्त्रात्मक राज्यका रुपमा संस्थागत गर्दै नागरिकका मौलिक हक, अधिकार, समानता, स्वतन्त्रता र सामाजिक न्यायको सुनिश्चितता गरेको बताए । उनले संविधानको प्रभावकारी कार्यान्वयन, सुशासन, समृद्धि र सामाजिक सद्भाव कायम गर्नु आजको आवश्यकता रहेको पनि बताए ।

कार्यक्रममा यूएईमा क्रियाशील विभिन्न नेपाली संघसंस्थाका अध्यक्ष तथा प्रतिनिधिहरुले संविधान दिवसको अवसरमा आफ्ना शुभकामना मन्तव्यहरु राखेका थिए । उनीहरुले संविधानले सुनिश्चित गरेका अधिकारको संरक्षण, कार्यान्वयन तथा नेपाल र नेपालीको समृद्धिका लागि एकताबद्ध भएर अघि बढ्नुपर्नेमा जोड दिएका थिए ।

यूएई । नेपाली राजदूतावास अबुधाबीले रसुवाको भोटेकोशी नदीमा आएको बाढीको कारण ज्यान गुमाएकाहरुको सम्मानमा भदौ २२ गते सोमबार दूतावास परिसरमा दीप प्रज्ज्वलन तथा शोकसभा सम्पन्न गरेको छ । कार्यक्रममा पीडित परिवारजनहरुमा गहिरो समवेदना प्रकट गर्दै घाइतेहरुको शीघ्र स्वास्थ्य लाभ, अज्ञात व्यक्तिहरुको सकुशल उद्धार तथा पुनर्मिलनको कामनासहित दीप प्रज्ज्वलन गरिएको थियो । शोकसभामा यूएईमा क्रियाशील विभिन्न नेपाली संघसंस्थाका प्रतिनिधिहरुको सहभागिता रहेको थियो ।

शोकसभालाई सम्बोधन गर्दै महामहिम राजदूत तेजबहादुर क्षेत्रीले प्राकृतिक विपत्तिका कारण पु¥याएको पीडा र भौतिक रुपमा भएको अपूरणीय क्षतिप्रति दुःख व्यक्त गर्दै नेपालको पुनर्निर्माण कार्यलाई पुनः अघि बढाउन सबैले हातेमालो गरी सहयोगी भावनाले अघि बढ्नुपर्ने बताए । उनले यूएई सरकारले उपलब्ध गराएको राहत सहयोगको मुक्तकण्ठले प्रशंसा गर्दै नेपाल सरकारका तर्फबाट यूएई सरकारप्रति हार्दिक आभार तथा कृतज्ञता व्यक्त गरे ।

उनले यूएई सरकारले गरेको यो सहयोग प्राप्त हुनुमा नेपाली समुदायको ठूलो योगदान रहेको बताउँदै नेपाली समुदायलाई धन्यवाद दिए । उनले नेपाललाई सहयोग गर्ने विदेशी संघसंस्था, नेपाली समुदाय तथा शुभचिन्तकहरुप्रति आभार व्यक्त गर्दै यूएईमा रहेको नेपाली समुदायले खुला हृदयले गरेको मानवीय सहयोगप्रति धन्यवाद व्यक्तसमेत गरे ।

यूएई । संयुक्त अरब इमिरेट्स (यूएई)को राजधानी अबुधाबीस्थित नेपाली राजदूतावासमा नेपालको संविधान दिवस तथा राष्ट्रिय दिवस २०८३ विभिन्न कार्यक्रमका साथ मनाइएको थियो । नेपाली राजदूतावास अबुधाबीले २०८३ असोज ३ गते संविधान दिवस तथा राष्ट्रिय दिवसको अवसरमा विशेष कार्यक्रम आयोजना गरेको हो । कार्यक्रममा यूएईमा क्रियाशील विभिन्न नेपाली संघसंस्थाका प्रतिनिधि, सामाजिक अभियन्ता, पत्रकार, व्यवसायी तथा नेपाली समुदायका सदस्यसहित करिब ५० जनाको उपस्थिति रहेको थियो ।

कार्यक्रममा नेपाली राजदूतावासका कूटनीतिक कर्मचारी, गैरआवासीय नेपाली संघ (एनआरएनए) यूएई, नेपाली समाज यूएई, नेपाल पत्रकार महासंघ यूएई, आदिवासी जनजाति महासंघ यूएई लगायत विभिन्न वैचारिक तथा सामाजिक संघसंस्थाका प्रतिनिधिहरुको सहभागिता रहेको थियो ।

कार्यक्रमलाई सम्बोधन गर्दै यूएईका लागि नेपाली राजदूत तेजबहादुर क्षेत्रीले नेपालको संविधान नेपाली जनताको लामो संघर्ष र बलिदानबाट प्राप्त ऐतिहासिक उपलब्धि भएको उल्लेख गरेका थिए । उनले संविधानले प्रत्याभूत गरेका जनताका हक, अधिकार, लोकतान्त्रिक मूल्य–मान्यता तथा संघीय व्यवस्थाको संस्थागत विकासमा सबैको महत्वपूर्ण भूमिका रहने बताए ।

उनले सुशासन, विकास र समृद्धिका लागि सरकारले अघि सारेका नीति तथा कार्यक्रमलाई सफल बनाउन सबै पक्षबाट सहयोग र सहकार्य आवश्यक रहेको धारणा व्यक्त गर्दै नेपालमा हालै आएको प्राकृतिक विपद्बाट उत्पन्न परिस्थितिको सामना गर्न विदेशमा रहेका नेपाली समुदायले पनि आफ्नो क्षेत्रबाट सक्दो सहयोग गर्न आह्वान गरेका थिए ।

कार्यक्रममा यूएईमा क्रियाशील विभिन्न नेपाली संघसंस्थाका अध्यक्ष तथा प्रतिनिधिहरुले संविधान दिवसको अवसरमा आफ्ना विचार व्यक्त गर्दै संविधानले सुनिश्चित गरेका अधिकारको संरक्षण, कार्यान्वयन तथा नेपाल र नेपालीको समृद्धिका लागि एकताबद्ध भएर अघि बढ्नुपर्नेमा जोड दिएका थिए ।

यूएई । प्रवासी नेपाली मञ्च (ओएनएफ) मध्यपूर्व महादेशको अध्यक्षमा बाबुराम सापकोटा निर्वाचित भएका छन् । सेप्टेम्बर ११ तारिखमा सम्पन्न ओएनएफ मध्यपूर्व महादेशीय कमिटीको प्रथम अधिवेशनले सापकोटाको नेतृत्वमा २१ सदस्यीय नयाँ कार्यसमिति निर्वाचित गरेको हो । अधिवेशनले उपाध्यक्षमा गीता सुवेदी, सचिवमा राजु खनाल र दुई जना उपसचिवमा मेनुका खतिवडा र महेशप्रसाद न्यौपानेलाई निर्वाचित गरेको छ ।

यसैगरी सदस्यहरुमा विजयविक्रम बस्नेत, शोभाखर भुसाल, शेख हश नवाज, गोपाल बस्नेत, अच्युत तिम्सिना र ऋषि भट्टराई, कृष्णप्रसाद आचार्य, गोकुल कुइँकेल, चन्द्र गुरुङ, धर्मप्रसाद बराल, नानुराज बराल, रामकुमार आचार्य (रञ्जीत), राजुप्रसाद भट्टराई, विष्णुलाल श्रेष्ठ, शिवजंग गुरुङ र यम लामा बम्जनलाई निर्वाचित गरेको छ ।

भर्चुचल माध्यमबाट भएको अधिवेशनको उद्घाटन नेकपा एमालेका महासचिव शंकर पोखरेलले गरेका थिए ।

यूएई । अर्घाखांची सम्पर्क समिति यूएईको अध्यक्षमा चिरन आचार्य सर्वसम्मत चयन भएका छन । गत ६ सेप्टेम्बर २०२६ आइतबारका दिन दुबईस्थित याक एण्ड यति क्लब एभरेष्टको हलमा आयोजित ७औं अधिवेशनले नयाँ कार्यसमिति सर्वसम्मत चयन गरेको हो । जसको वरिष्ठ उपाध्यक्षमा ओम केसी, प्रथम उपाध्यक्षमा अमित पाण्डे, महिला उपाध्यक्षमा पार्वता श्रेष्ठ मल्ल, उपाध्यक्षमा हिमेन्द्र क्षेत्री, राकेश रायमाझी, गंगा बस्नेत पन्थी, मणिराम गैरे, भीम केसी र गणेशप्रसाद पौडेल रहेका छन् । त्यसैगरी महासचिवमा नवराज सिंह ठकुरी, सचिवमा रामप्रसाद श्रेष्ठ, कोषाध्यक्षमा हरी बिसी चयन भएका छन् ।

त्यसैगरी कार्यसमिति सदस्यहरुमा क्रमशः सुनिल थापा, छन्द श्रेष्ठ, उमा घिमिरे, मन्जु घिमिरे, सिद्धार्थ भुसाल, कमल खनाल, अनिल खड्का, गोविन्द पोखरेल, सम्झना खनाल, रामबहादुर अधिकारी, नारायणप्रसाद पौडेल, तारा बिरकट्टा मगर, मधु रेश्मी मगर, हरी भण्डारी, जुनु पन्थी, अर्चना पाण्डे, बाबुराम भुसाल, राहुल खनाल, जीवन खनाल, अनु शर्मा, प्रियंका श्रेष्ठ, तारा परियार, कृष्ण गमाल, अशोक श्रेष्ठ, लेखनाथ अधिकारी, शिला खनाल, जानाका घिमिरे र पुष्पा भाटलाई चयन गरेको छ ।

नेपाली समाज यूएईका अध्यक्ष राम मोक्तानको प्रमुख आतिथ्यतमा सम्पन्न उक्त कार्यक्रमको अध्यक्षता अर्घाखाँची सम्पर्क समिति यूएईका तत्कालीन अध्यक्ष जेपी पोखरेलले गरेका थिए । कार्यक्रममा नेपालमा आएको प्राकृतिक बिपत्तीमा परी ज्यान गुमाएका दिवंगत आत्माको शान्तिको लागि १ सय ८ दियो जलाएर मौनधारण गर्दै घाइतेहरुका लागि शीघ्र स्वास्थ्य लाभको कामना गरिएको थियो । साथै बाढीपीडितमा परेकालाई अर्घाखाँची सम्पर्क समिति यूएईको तर्फबाट राहत सहयोगस्वरुप यूएई दिराम ११ हजार लगभग नेपाली रु ४ लाख ५१ हजार रुपैयाँ नेपाली समाज यूएईका अध्यक्ष राम मोक्तानलाई हस्तान्तरण गरिएको थियो ।

यूएई । भोटेकोशी नदीमा आएको भीषण बाढीका कारण ज्यान गुमाउने नागरिकको सम्झनामा प्रवास नेपाली सम्पर्क विभाग यूएईले श्रद्धाञ्जली सभा सम्पन्न गरेको छ ।

विभागका प्रमुख सुजन थापाको सभापतित्वमा गत १३ सेप्टेम्बरमा बरदुबईको क्लब एभरेष्टमा उक्त सभा आयोजना गरिएको थियो । कार्यक्रममा प्रमुख अतिथि नेपाली महावाणिज्यदूतावास दुबईका उपमहावाणिज्यदूत कृष्णप्रसाद चापागार्इं रहेका थिए । सभामा यूएईमा क्रियाशील विभिन्न वैचारिक संस्थाका प्रमुखहरु, नेपाली समाज, एनआरएन लगायतका सामाजिक संस्थाका प्रतिनितिहरुको उपस्थिति रहेको थियो ।

सभामा भोटेकोशीमा आएको बाढीका कारण ज्यान गुमाउनेहरुको सम्झनामा मौन धारण, दीप प्रज्ज्वलन गरिएको थियो । साथै कार्यक्रमका वक्ताहरुले शोकसन्तप्त परिवारजनमा समवेदना प्रकट गर्दै बेपत्ताहरुको छिटो खोजीकार्य होस् र घाइतेहरुको शीघ्र स्वास्थ्य लाभ होस् भन्ने कामना गरेका थिए ।

काठमाडौँ, २३ असोजः कानुन, न्याय तथा संसदीय मामिलामन्त्री सोविता गौतमसँग नेपालका लागि फ्रान्सेली राजदूत फ्रान्स्वाज पुइग–उन्जाले शिष्टाचार भेट गरेकी छिन् । मन्त्री गौतमसँग आज सिंहदरबारमा भएको भेटमा राजदूत इन्जाले भोटेकोशी बाढीबाट भएको क्षतिले मृत्यु भएका व्यक्तिहरूप्रति समवेदना व्यक्त गरिन् । कानुन, न्याय तथा संसदीय मामिला मन्त्रालय पारस्परिक कानुनी सहायताको केन्द्र निकाय भएको हुँदा यस विषयमा दुई देशबीचको सहमति गर्नका लागि प्रक्रिया सक्दो चाँडो गर्न दुवै पक्षबीच छलफल भयो ।

त्यस्तै, सरकारले नेपालको हवाई सेवालाई अन्तरराष्ट्रिय मापदण्डअनुसार सेवा प्रदायक र नियामक निकायका रूपमा दुई संरचना परिकल्पना गरी विधेयक दर्ता गरेको विषयमा छलफल भयो । राजदूत उन्जाले यसमार्फत हवाई सुरक्षा कालोसूचीबाट हट्नका लागि नेपाल सरकारबाट भइरहेका प्रयासको प्रशंसा गरिन् । भेटमा दुवै पक्षले द्विपक्षीय सहयोगलाई थप सुदृढ बनाउँदै आवश्यकताअनुसार समन्वयलाई निरन्तरता दिने प्रतिबद्धता व्यक्त गरिन् । भेटमा कानुन र परराष्ट्र मन्त्रालयका अधिकारीहरूको उपस्थिति थियो ।

काठमाडौँ, २२ असोजः नेपाली सेनाले बेलायतमा सम्पन्न अन्तरराष्ट्रिय सैनिक अभ्यास ‘एक्सरसाइज क्यामब्रियान पट्रोल २०२६’ मा स्वर्ण पदक प्राप्त गरेको छ । बेलायतको वेल्सस्थित ब्रेकनमा यही असोज २१ देखि २२ सम्म सञ्चालन भएको सो प्रतियोगितामा नेपाली सेनाको टोलीले स्वर्ण पदक हासिल गरेको छ ।

संयुक्त अधिराज्य बेलायतको औपचारिक भ्रमणमा रहेका प्रधान सेनापति अशोकराज सिग्देलको उपस्थितिमा उक्त अभ्यासको पदक वितरण भएको जनसम्पर्क तथा सूचना निर्देशनालयले जनाएको छ । उक्त प्रतियोगितामा संयुक्त अधिराज्य बेलायतसहित ३५ राष्ट्रका १३० टोलीले सहभागिता जनाएका थिए । सन् १९६० देखि प्रत्येक बर्ष आयोजना हुँदै आएको यो अभ्यासमा नेपाली सेना सन् २०१४ देखि नै सहभागी भइरहेको छ ।

यस प्रतियोगितामा सहभागी टोलीले करिब ७० पाउन्ड तौल बराबरको उपकरणसहित ४० माइल दूरी दुई दिनभित्र पार गर्नुपर्ने हुन्छ । त्यस क्रममा हतियार सञ्चालन, सूचना सङ्कलन, घाइते र बिरामीको व्यवस्थापनलगायत विविध सैनिक कलाहरूको परीक्षण पनि गरिन्छ । यसअघि पनि नेपाली सेनाले सो प्रतियोगितामा सन् २०१७, २०१९, २०२४ र २०२५ मा स्वर्ण पदक हात पारिसकेको छ ।

काठमाडौँ, २१ असोज । बेलायतको औपचारिक भ्रमणमा रहेका प्रधान सेनापति अशोकराज सिग्देलले आज बेलायती सेनाका चिफ अफ द जनरल स्टाफ सर रोली वाकरसँग भेटवार्ता गरेका छन् । सर वाकरको मैत्रीपूर्ण निमन्त्रणामा साताव्यापी औपचारिक भ्रमणका लागि प्रधान सेनापति सिग्देल गत सोमबार बेलायत प्रस्थान गरेका थिए ।

नेपाली सेनाको जनसम्पर्क तथा सूचना निर्देशनालयले दिएको जानकारी अनुसार प्रधान सेनापति सिग्देल र बेलायती सेनाका चिफ अफ द जनरल स्टाफबीच आज भएको भेटमा आपसी हित र नेपाल बेलायत सैनिक सम्बन्धका बारेमा कुराकानी भएको जनाइएको छ । साथै यस भ्रमणका क्रममा उनले हिजो पनि विभिन्न उच्च सैनिक अधिकारीहरुसँग भेटवार्ता गरेका थिए । त्यस्तै उनले गोरखा सैनिक स्मारकमा पुष्प गुच्छा अर्पण गरी श्रद्धाञ्जली अर्पण गरेको पनि निर्देशनालयले जनाएको छ ।

काठमाडौँ, १९ असोजः प्रधान सेनापति अशोकराज सिग्देल औपचारिक भ्रमणका लागि आज बेलायत प्रस्थान गरेका छन् । बेलायती सेनाका चिफ अफ द जनरल स्टाफ सर रोली वाकरको निमन्त्रणामा उनी साताव्यापी औपचारिक भ्रमणका लागि आज त्यसतर्फ प्रस्थान गरेको सैनिक जनसम्पर्क तथा सूचना निर्देशनालयले जनाएको छ ।

प्रधान सेनापति सिग्देललाई त्रिभुवन अन्तरराष्ट्रिय विमानस्थलमा बलाधिकृत रथी प्रदीपजङ्ग केसीले बिदाइ गरे । भ्रमणले सदियौँदेखि रहँदै आएको दुई देशबीचको आपसी सैनिक सम्बन्धमा टेवा पुग्नुका साथै सैनिक कूटनीतिमार्फत नेपालको परराष्ट्र नीतिमा योगदान पुग्ने विश्वास नेपाली सेनाले लिएको निर्देशनालयद्वारा जारी विज्ञप्तिमा जनाइएको छ । उनका अनुपस्थितिमा बलाधिकृत रथी प्रदीपजङ्ग केसीले कायममुकायम प्रधान सेनापतिको कार्यभार सम्हाल्नेछन् ।

लक्ष्मण खनाल
यूएई
काठमाडौंको स्वयम्भू, धार्मिक, सांस्कृतिक र ऐतिहासिक पहिचान बोकेको यो ठाउँमा धेरैका बाल्यकालका कथा जोडिएका छन् । त्यही स्वयम्भूको मध्यमवर्गीय परिवारमा जन्मिएका राम मोक्तानको जीवनकथा पनि यहीँबाट शुरु हुन्छ । सामान्य पारिवारिक वातावरणमा हुर्किएका मोक्तानले बाल्यकालमा ठूलाठूला सपना देखेका थिए वा थिएनन्, त्यो अलग विषय हो । तर समयक्रममा उनले भोगेका चुनौती, गरेका निर्णय र अवसरलाई समात्दै अघि बढ्ने दृढताले उनको जीवनलाई एउटा लामो संघर्षमय यात्रामा रुपान्तरण ग¥यो ।

नेपाली सेनामा कार्यरत बाबु र गृहिणी आमाका तीन सन्तानमध्येका एक रामले आफ्नो बाल्यकाल स्वयम्भूमै बिताए । एक दिदी र एक बहिनीसँगै हुर्किएका उनले पारिवारिक स्रोत सीमित भए पनि शिक्षाको अवसर पाए । आमाबाबुले आफूले सकेको समय, श्रम र आर्थिक स्रोत व्यवस्थापन गरेर छोराछोरीको शिक्षामा लगानी गरे ।
२०४७ को एसएलसीपछि उच्च शिक्षाको यात्रालाई निरन्तरता दिने क्रममा उनी काठमाडौंको पिपल्स कलेजमा आईकम अध्ययनका लागि भर्ना भए । आईकम उत्तीर्ण गरेपछि संयुक्त पाटन क्याम्पसमा बीकम अध्ययन शुरु गरे । अध्ययनलाई निरन्तरता दिँदै उनले विभिन्न ठाउँमा अध्यापनको कामसमेत गर्न थाले । त्यो समय सम्झिँदा मोक्तानको स्मृतिमा आज पनि एउटा अंक ताजा छ– दुई हजार रुपैयाँ । ‘त्यो बेला दुई हजार रुपैयाँ तलब थियो । झण्डै तीन वर्ष मैले पढाएँ’, उनी विगत सम्झन्छन् । आजको हिसाबले सामान्य लाग्न सक्ने त्यो रकम त्यतिबेला उनको जीवनमा महत्वपूर्ण आम्दानी थियो । अध्ययनसँगै काम अनि आत्मनिर्भर बन्ने अभ्यास पनि ।

चिसो स्वयम्भूबाट तातो दुबईको सडकसम्म
८ अप्रिल १९९८ मा राम मोक्तान दुबई पुगे । स्वयम्भूको चिसो वातावरणमा हुर्किएका रामका लागि दुबईको तातो मौसम र नयाँ परिवेश आफैंमा चुनौतीपूर्ण थियो । नेपालमा बसेर कल्पना गरेको विदेश र वास्तविक विदेशबीचको अन्तर उनले पुगेपछि महसुस गरे ।

दुबई पुगेपछि मार्केटिङसम्बन्धी काम गर्ने भनिएको थियो । तर कामको वास्तविक स्वरुपमा पुग्दा महिला र पुरुष कामदारका जिम्मेवारी फरक रहेछन् । महिलाले इन्डोर र पुरुषले आउटडोर काम गर्नुपर्ने व्यवस्था थियो । रामले आउटडोर काम गर्न थाले ।

काठमाडौंको तुलनात्मक रुपमा चिसो वातावरणमा जन्मे–हुर्केका उनलाई दुबईको गर्मीमा बाहिर काम गर्नु सहज थिएन । तर जीवनमा केही गर्नुपर्छ भन्ने अठोटले उनलाई कठिनाइसँग सम्झौता गर्न सिकायो । उनको शुरुआती तलब ९०० दिराम थियो । त्यतिबेला एक दिरामको मूल्य करिब १४ नेपाली रुपैयाँ पर्ने उनी सम्झन्छन् । आजको तुलनामा रकम सानो देखिए पनि त्यस समयको यूएईको जीवनयापनको लागत पनि तुलनात्मक रुपमा कम थियो ।

रामका अनुसार त्यतिबेला करिब ४०० दिराममा खान र बस्नको आधारभूत खर्च व्यवस्थापन गर्न सकिन्थ्यो । यूएईमा अहिले जस्तो भीडभाड र नेपाली श्रमिकको बाक्लो उपस्थिति पनि थिएन । त्यो समयको यूएई आजको जस्तो थिएन । विदेशी कामदारको विस्तार हुँदै थियो, तर नेपालीको संख्या निकै कम थियो ।

मेहनतले बदलिएको जिम्मेवारी
रामको विदेश यात्राको अर्को महत्वपूर्ण पक्ष उनको कामप्रतिको लगनशीलता थियो । उनले शुरुआत आउटडोर कामबाट गरे पनि केही समयमै आफ्नो क्षमता देखाउने अवसर पाए । कम्पनीमा काम थालेको करिब १५ महिनामै उनी स्टोरमा क्यासियरका रुपमा काम गर्न थाले । आउटडोर कामको तुलनामा स्टोरभित्रको जिम्मेवारी उनका लागि सहज बन्दै गयो । तर उनको प्रगति त्यतिमै रोकिएन ।

क्यासियरको जिम्मेवारी सम्हालेको करिब ६ महिनामै उनी सिफ्ट इन्चार्ज बने । काम सिक्ने, जिम्मेवारी बहन गर्ने र नयाँ वातावरणमा आफूलाई ढाल्ने उनको क्षमताले उनलाई क्रमशः माथिल्लो जिम्मेवारीतर्फ लैजान थाल्यो । विदेशमा पुगेपछि केवल तलबका लागि काम गर्नेभन्दा पनि काम सिक्दै अघि बढ्ने उनको सोंचले उनलाई फरक बाटोमा पु¥यायो । त्यसको करिब दुई वर्षपछि उनी सोही कम्पनीमा सुपरभाइजर बने । सन् २००० मा सुपरभाइजरको जिम्मेवारी पाएका उनले त्यसपछि पनि एउटै पदमा सीमित भएर बस्नुपरेन । जिम्मेवारी र अनुभव बढ्दै जाँदा उनको कामको दायरा पनि विस्तार हुँदै गयो ।

कम्पनीका विभिन्न मल्टिपल स्टोरमा काम गर्ने अवसर उनले पाए । फरक–फरक स्टोर, फरक वातावरण र फरक जिम्मेवारीले उनको व्यावसायिक अनुभवलाई थप फराकिलो बनाउँदै लग्यो । यो क्रम सन् २००५ सम्म निरन्तर चल्यो ।

सफलतासँगै उठेको अर्को प्रश्न
सन् २००० देखि सुपरभाइजरको जिम्मेवारी सम्हाल्दै आएका रामका लागि सन् २००५ सम्म आइपुग्दा कामको अनुभव निकै फराकिलो भइसकेको थियो । कम्पनी, स्टोर सञ्चालन, कर्मचारी व्यवस्थापन र ग्राहकसँगको व्यवहार लगायतका विषयमा उनले पर्याप्त अनुभव हासिल गरिसकेका थिए ।

तर मानिसको जीवनमा एउटा बिन्दु यस्तो आउँछ, जहाँ प्राप्त उपलब्धिभन्दा अगाडिको बाटो महत्वपूर्ण बन्न थाल्छ । रामको मनमा पनि त्यही प्रश्न उठ्न थाल्यो– अब यही कम्पनीमा थप के गर्ने ? सुपरभाइजरको जिम्मेवारीमा रहेर उनले आफ्नो भविष्यका सम्भावनाबारे सोंच्न थाले । आफूले सिकेको अनुभवलाई कसरी अगाडि बढाउने भन्ने प्रश्न उनको मनमा गहिरिँदै गयो ।

त्यो समय यूएईमा व्यक्तिगत रुपमा अगाडि बढ्नका लागि आवश्यक केही प्रक्रियासमेत अहिलेको तुलनामा फरक थिए । उदाहरणका लागि, ड्राइभिङ लाइसेन्स लिनका लागि पनि कम्पनीबाट अनापत्ति प्रमाणपत्र (एनओसी) लिनुपर्ने व्यवस्था थियो । त्यसैले विदेशमा अवसर खोज्नु भनेको केवल विदेश पुग्नु मात्र थिएन । त्यहाँ पुगिसकेपछि पनि विभिन्न प्रशासनिक, व्यावसायिक र सामाजिक सीमाभित्र रहेर आफ्नो बाटो बनाउनुपर्ने अवस्था थियो ।

परदेशमा नेपाली अनुहारको खोजी
आज यूएईमा नेपाली समुदायको उपस्थिति ठूलो छ । नेपाली भाषा, संस्कृति, खानपान र समुदायसँग सम्बन्धित गतिविधि सहजै भेटिन्छन् । तर राम मोक्तानले यूएईमा आफ्नो शुरुआती दिन बिताउँदा अवस्था निकै फरक थियो । त्यतिबेला यूएईमा नेपालीको संख्या अत्यन्तै कम थियो । उनको वरिपरि प्रायः फिलिपिनो र भारतीय नागरिकहरु भेटिन्थे । काम गर्ने ठाउँमा पनि उनीहरुकै बाहुल्य थियो । त्यसैले परदेशमा कतै नेपाली अनुहार देखिनु पनि उनका लागि ठूलो भावनात्मक घटना हुन्थ्यो । ‘एकजना नेपाली देख्दा पनि मनमा घरै गएजस्तो आनन्द आउँथ्यो’, राम ती दिन सम्झँदै भन्छन् ।

परदेशमा आफ्नो देशको मान्छे भेटिनु केवल संयोग थिएन । त्यो घरको सम्झना, आफ्नो भाषा र संस्कृतिको सम्झना तथा आफू एक्लो नभएको अनुभूति थियो । आज यूएईमा नेपालीको बाक्लो उपस्थिति देख्दा रामलाई आफ्नो प्रारम्भिक दिन अझ स्पष्टसँग सम्झना हुन्छ । त्यतिबेला नेपाली समुदाय सानो थियो, अवसर सीमित थिए र विदेशमा आफ्नो पहिचान बनाउने यात्रा झनै कठिन थियो ।

संघर्षबाट अवसरसम्म
सन् २००५ सम्म एउटै कम्पनीमा विभिन्न जिम्मेवारी सम्हालिसकेपछि राम मोक्तानको मनमा एउटा कुरा स्पष्ट हुँदै गयो– अनुभव मात्र पर्याप्त छैन, अब सीप र औपचारिक शिक्षालाई पनि आफ्नो यात्राको आधार बनाउनुपर्छ । यूएईमा काम गर्दै आएका नेपालीका लागि त्यतिबेला उच्च शिक्षा हासिल गर्नु सामान्य विषय थिएन ।
ड्राइभिङ लाइसेन्सका लागि कम्पनीको एनओसी आवश्यक पर्ने अवस्था थियो ।

त्यसपछि उनले आफ्नो समयलाई अझ व्यवस्थित गर्दै अध्ययनतर्फ ध्यान केन्द्रित गरे । सन् २००६ देखि २००८ सम्मको अवधि उनको जीवनमा अर्को महत्वपूर्ण अध्याय बन्यो । यही अवधिमा उनले आफ्नो व्यावसायिक जीवनलाई नयाँ दिशामा लैजाने उद्देश्यका साथ अध्ययनलाई प्राथमिकता दिए । नेपालमा रहँदादेखि नै कम्प्युटर र प्रविधिसँग सम्बन्धित विषयमा उनको रुचि थियो । त्यसैले उनले आफ्नो पुरानो रुचिलाई औपचारिक शिक्षामा परिणत गर्ने निर्णय गरे ।

कम्प्युटर नेटवर्किङ, हार्डवेयर लगायतका विषय समेटिएको सूचना प्रविधि अध्ययन रोज्दै उनले मणिपाल विश्वविद्यालयबाट बीएस्सी आईटी अध्ययन पूरा गरे । विदेशमा पूर्णकालीन काम गर्दै उच्च शिक्षा हासिल गर्नु सजिलो थिएन । कामको जिम्मेवारी र पढाइलाई सँगसँगै अघि बढाउन अनुशासन, समय व्यवस्थापन र निरन्तर मेहनत आवश्यक थियो । रामले यही चुनौतीलाई अवसरका रुपमा लिए । उनको हातमा डिग्री र सीप दुवै आएपछि उनको व्यावसायिक यात्राको स्वरुप पनि बदलिन थाल्यो ।

पेट्रोलियम कम्पनीको हेड अफिससम्म
सीप र शैक्षिक योग्यता थपिएपछि रामको करिअरले नयाँ गति लियो । सन् २००८ मा उनी बढुवा हुँदै कम्पनीको हेड अफिस पुगे । उनी अब मानव संसाधन अर्थात् एचआरसम्बन्धी काममा प्रवेश गरे । सन् २००८ देखि २००९ सम्म उनले एचआरमा काम गरे । लामो समयसम्म कर्मचारी व्यवस्थापन, संस्थागत प्रक्रिया र कार्यालय सञ्चालनसँग सम्बन्धित विषयमा काम गर्दा उनले व्यवसायको अर्को पक्ष बुझ्ने अवसर पाए ।

सन् २०१० देखि २०१४ मा उनी आईटी कोअर्डिनेटरको जिम्मेवारीमा पुगे । आईटीमा अध्ययन गरेको ज्ञान र पहिलेको कार्यअनुभवलाई जोडेर काम गर्ने अवसर उनले पाए । वर्षौंसम्म एउटै संस्थामा काम गरेर अनुभव, जिम्मेवारी र आफ्नो स्थान बनाइसकेका काम खोज्दै हिँड्दा उनले आफूलाई थप स्वअध्ययनमा केन्द्रित गरे । आफूले जानेका विषयलाई पुनः रिपिट गर्नेे, नयाँ कुरा सिक्ने र आफ्नो सीपलाई बजारको आवश्यकताअनुसार परिमार्जन गर्ने काम उनले जारी राखे । त्यो समय उनका लागि कठिन थियो, तर त्यही कठिन समयले उनलाई अर्को अवसरका लागि तयार पनि पारिरहेको थियो ।

युनिलिभरबाट नेस्लेसम्मको यात्रा
सन् २०१५ मा रामले युनिलिभरमा काम शुरु गरे । उनले फिल्ड म्यानेजरका रुपमा जिम्मेवारी सम्हाले । यसपटक उनले नयाँ कम्पनी, नयाँ संरचना र नयाँ कार्यशैलीमा आफूलाई अनुकूल बनाए । सन् २०१५ देखि २०२५ सम्म उनले युनिलिभरमा निरन्तर काम गरे । दश वर्ष लामो यो यात्राले उनलाई बजार, बिक्री, ग्राहक, व्यवस्थापन र फिल्डस्तरको व्यावसायिक संरचनाबारे थप अनुभव दियो ।

१९९८ मा यूएई प्रवेश गर्दा ९०० दिरामको तलबबाट शुरु भएको उनको यात्रा आज व्यवस्थापन तहको जिम्मेवारीसम्म आइपुगेको छ । तर रामका लागि पद र तलब मात्र सफलताको मापदण्ड होइनन् । उनले आफ्नो यात्राबाट एउटा फरक निष्कर्ष निकालेका छन्– सीप र शिक्षा जीवनमा जुनसुकै समयमा नयाँ ढोका खोल्न सक्छन् । विदेशमा लामो समय बिताए पनि परिवारप्रतिको सम्बन्ध र जिम्मेवारी उनको जीवनको महत्वपूर्ण पक्ष बनेको छ ।

केही शब्द, जुन अझै बिर्सन सकेका छैनन्
रामको जीवनमा धेरै सुखद उपलब्धि छन् । तर केही घटनाहरु यस्ता छन्, जसलाई सम्झँदा आज पनि उनको मन दुख्छ । उनका अनुसार त्यसमध्ये एउटा घटना सन् २०१५ को हो । त्यतिबेला उनी नयाँ जागिरको खोजीमा थिए । आईटी अध्ययन पूरा गरिसकेका र स्किल वर्कका लागि अन्तरवार्ता दिइरहेका थिए । त्यही क्रममा एक भारतीय नागरिकले गरेको प्रश्नले उनलाई गहिरो चोट पु¥यायो । उनले नेपाली नागरिकको क्षमतालाई लिएर आश्चर्य व्यक्त गर्दै नेपालीहरु यस क्षेत्रमा कसरी आए भन्ने आशयको प्रश्न गरेका थिए । नेपालीहरु आफ्नोमा गार्ड र घरायसी काममा मात्र देखेको उल्लेखसमेत गरेका थिए ।

रामका लागि त्यो टिप्पणी केवल एउटा व्यक्तिको प्रश्न थिएन । उनले त्यसलाई नेपालीको क्षमता र व्यावसायिक पहिचानप्रतिको पूर्वाग्रहका रुपमा अनुभव गरे । उनलाई त्यो घटना आज पनि पीडादायी लाग्छ । तर त्यही घटनाले उनलाई एउटा कुरा अझ बलियोसँग महसुस गरायो– नेपालीले आफूलाई सीप, शिक्षा र व्यावसायिक दक्षतामार्फत प्रमाणित गर्नुपर्छ ।

नेपाली समुदायमाझ राम
रामको जीवनको अर्को महत्वपूर्ण पक्ष उनको सामाजिक सक्रियता हो । विदेशमा व्यक्तिगत सफलता हासिल गरेपछि धेरै मानिस आफ्नो परिवार र करिअरमा मात्र केन्द्रित हुन्छन् । तर रामले भने आफ्नो समय, स्रोत र अनुभवको केही हिस्सा नेपाली समुदायका लागि पनि खर्चिए । विदेशमा बसेर पनि नेपाली समुदायका लागि केही गर्नुपर्छ भन्ने सोंचले उनलाई विभिन्न सामाजिक संस्थासँग जोड्यो ।

उनको प्राथमिकतामा नेपाली समुदायलाई विभाजित गर्नु होइन, एकताबद्ध गर्नु रह्यो । समस्यामा परेका नेपालीलाई सहयोग गर्ने, अप्ठ्यारोमा परेकालाई उद्धार गर्ने, राहत उपलब्ध गराउने र आवश्यक पर्दा नीतिगत विषयमा समेत सहयोग गर्ने काममा उनले सक्रिय भूमिका खेले । यिनै कामले उनलाई व्यक्तिगत रुपमा आत्मसन्तुष्टि दिएको उनी बताउँछन् ।

सन् २००५ देखि सामाजिक नेतृत्व
रामको सामाजिक यात्रालाई हेर्दा सन् २००५ एउटा महत्वपूर्ण वर्ष हो । उनी तामाङ समाज यूएई स्थापनाका संस्थापकहरुमध्ये एक हुन् । संस्थाको नेतृत्वमा समेत उनले जिम्मेवारी सम्हाले । तामाङ समाजको अध्यक्षका रुपमा दुई पटक काम गरिसकेका उनले त्यसपछि नेपाली समाजमा पनि विभिन्न पदाधिकारीका रुपमा काम गरे ।

यसरी उनको सामाजिक यात्रा कुनै एउटा संस्थामा सीमित रहेन ।
समुदायका विभिन्न तह र संरचनामा काम गर्ने क्रममा उनले विदेशमा रहेका नेपालीका समस्या नजिकबाट देखे । रोजगार, कानुनी समस्या, आर्थिक कठिनाइ, स्वास्थ्य समस्या, पारिवारिक संकट तथा मृत्युजस्ता संवेदनशील अवस्थामा नेपालीहरुलाई पर्ने कठिनाइ उनले प्रत्यक्ष अनुभव गरे । त्यसले उनको सामाजिक भूमिकालाई अझ जिम्मेवार बनाउँदै लग्यो । सन् २०२५ देखि उनी नेपाली समाज यूएईको अध्यक्षका रुपमा काम गरिरहेका छन् ।

दुःखमा परेका नेपालीका सहारा
नेपाली समाज यूएईको नेतृत्वमा पुगेपछि पनि रामको प्राथमिकता औपचारिक पदमा सीमित छैन । लामो समयदेखि बिरामी रहेका नेपालीलाई सहयोग गर्नेदेखि उपचार तथा उद्धारमा सहजीकरण गर्ने, आर्थिक समस्यामा परेकालाई सम्भव सहयोग जुटाउने र विभिन्न कारणले अलपत्र परेकालाई घर फर्काउन पहल गर्ने काममा उनी सक्रिय छन् ।

विदेशमा सबैभन्दा कठिन अवस्था भनेको मृत्यु हुने नेपालीको शव नेपाल पठाउने विषय पनि हो । परिवार आर्थिक तथा अन्य कारणले अन्तिम संस्कार गर्न नसक्ने अवस्थामा समेत उनले सहयोग र समन्वय गर्ने गरेका छन् । चाहे कोभिडको बेला होस् वा नेपालको जाजरकोटको भूकम्प वा हालैको बाढी होस्, रामले विदेशस्थित सम्पूर्ण नेपाली संघसंस्थाहरुसँग मिलेर समाजको सेवामा योगदान पु¥याउँदै आएका छन् ।

कहिलेकाहीँ कुनै नेपाली ठगीमा पर्छन् । कहिलेकाहीँ रोजगारीको आशामा विदेश आएर अलपत्र पर्छन् । कसैको कागजातमा समस्या हुन्छ, कसैलाई आर्थिक समस्या पर्छ । यस्ता अवस्थामा सहयोगका लागि फोन आउने क्रम रामका लागि नयाँ होइन । दुःखमा परेका नेपालीको उद्धार, ठगीमा परेकाको सहारा र अलपत्र परेकालाई सहयोग गर्नु उनको दैनिकीजस्तै बनेको छ । उनका लागि सामाजिक सेवा केवल संस्थाको कार्यक्रम होइन, परदेशमा रहेका नेपालीबीचको मानवीय जिम्मेवारी पनि हो ।

सीप सिकेर आउन सुझाव
आफ्नो लामो वैदेशिक जीवनलाई फर्केर हेर्दा रामले नेपाली युवाका लागि एउटा महत्वपूर्ण सन्देश दिएका छन् । उनको विचारमा विदेशमा अवसरको कमी छैन । तर अवसर समात्न आवश्यक तयारी भने नेपालमै गर्नुपर्छ । ‘हामीसँग नभएको हाम्रो सीप हो, थ्योरी हो । यी दुई कुरा सुधार गरेर विदेश आयौं भने हामी धेरै अगाडि जान सक्छौं’, उनी भन्छन् । उनका लागि यो भनाइ केवल अनुभवबाट आएको सामान्य सुझाव होइन । आफ्नै जीवनको यात्राले प्रमाणित गरेको निष्कर्ष हो ।

विदेश आउने नेपालीलाई सम्भव भएसम्म सीप र प्रमाणपत्र लिएर आउन आग्रह गर्छन् । दुवै सम्भव नभए कम्तीमा कुनै एउटा उपयोगी सीप सिकेर आउन उनको सुझाव छ । उनका अनुसार सीप र प्रमाणपत्र भएको व्यक्तिका लागि अवसरको दायरा फराकिलो हुन्छ । नेपाली युवाले सीप हासिल गर्नुपर्छ भन्ने उनको धारणा व्यक्तिको प्रयासमा मात्र सीमित छैन । त्यसका लागि राज्यको भूमिका पनि महत्वपूर्ण रहेको उनी मान्छन् । युवालाई विदेश जानुअघि आवश्यक सीप, भाषा, कामको प्रकृति, कानुनी प्रक्रिया, तलब, सुविधा र सम्भावित जोखिमबारे जानकारी दिने व्यवस्था बलियो बनाउन आवश्यक छ ।

विदेश जानु भनेको केवल टिकट काटेर अर्को देश पुग्नु होइन । कुन देशमा कुन प्रकारको रोजगारी उपलब्ध छ ? आफ्नो योग्यता र सीपसँग कुन काम मेल खान्छ ? तलब तथा सुविधा कस्तो छ ? कम्पनीको अवस्था कस्तो छ ? कानुनी प्रक्रिया के हो ? कामका लागि आवश्यक कागजात के–के हुन् ? विदेश पुगेपछि आफ्नो अधिकार र जिम्मेवारी के हुन् ? यी प्रश्नको उत्तर खोजेर मात्र विदेश आउनुपर्ने उनको सुझाव छ । उनले बुझेका छन्– विदेशमा सफल हुन केवल भाग्य पर्याप्त हुँदैन । शिक्षा, सीप, मेहनत, अनुशासन र सही निर्णय आवश्यक हुन्छ ।

१७ असोज, न्यूयोर्क । भोटेकोशी बाढीका कारण रसुवा र नुवाकोटमा प्रभावित नागरिकको उद्धार तथा राहतका लागि गैरआवासीय नेपाली संघ (एनआरएनए)ले सञ्चालन गरिरहेको राहत तथा मानवीय सहयोग अभियानअन्तर्गतका गतिविधिहरु २८औं दिनमा पनि निरन्तर जारी रहेको बताइएको छ ।

एनआरएनएका अनुसार, भोटेकोशी बाढीबाट प्रभावित नुवाकोटको तुप्चे र देवीघाटका ८० परिवारलाई खाद्यान्न, ग्यास, भाँडाकुँडा तथा अत्यावश्यक सामग्री वितरण गरिएको छ । एनसीसी फिलिपिन्स र स्टिचिङ नेपाल फण्ड, नेदरल्यान्ड्सको सौजन्यमा बाढीपहिरो प्रभावित परिवारका लागि राहत सामग्री उपलब्ध गराइएको हो ।

प्रभावित परिवारको आवश्यकताका आधारमा ग्यास सिलिण्डर, भाँडाकुँडा, खाद्यान्न लगायतका सामग्री वितरणसमेत गरिएको छ । राहत कार्यक्रमअन्तर्गत प्रभावितहरुलाई ग्याँस सिलिन्डर, प्रेसर कुकर, चुल्हो, पाइप, रेगुलेटर, क्लीप, कराई, थाल, डाडु, पन्यू, गिलास, कचौरा, चम्चा, जग र बाल्टिन लगायतका घरायसी तथा भान्साका अत्यावश्यक सामग्रीहरु उपलब्ध गराइएको जनाएको छ ।

सामग्री वितरणमा संघका केन्द्रीय उपाध्यक्ष बुद्धिसागर सुवेदी, उपाध्यक्ष तथा विपद् व्यवस्थापन समिति संयोजक मनोज श्रेष्ठ, एनसीसी नेदरल्याण्ड्सका संस्थापक अध्यक्ष शशी पौडेल, मध्यपूर्वका पूर्व उपसंयोजक धर्मराज गिरी र एनसीसी फिलिपिन्सका कोषाध्यक्ष प्रेम लामा लगायतको सहभागिता रहेको थियो ।

काजक्रिया सकेका २२ परिवार राहत वितरण
भोटेकोशी नदीको बाढीबाट आफन्त गुमाई काठमाडौंका विभिन्न क्रियाघरमा काजक्रिया सम्पन्न गरी हाल कोठा भाडामा लिएर बसिरहेका प्रभावित परिवारलाई सहयोगस्वरुप ग्यास सिलिन्डर, भाँडाकुँडा, खाद्यान्न लगायतका राहत सामग्री वितरण गरिएको छ । एनआरएनए सचिवालयबाट उतरगया तथा विदुरका गरी २२ प्रभावित परिवारलाई उक्त राहत सामग्री उपलब्ध गराइएको हो । बाढीबाट घर तथा आफन्त गुमाएका उनीहरु हाल काठमाडौं, नुवाकोट लगायतका स्थानमा कोठा भाडामा लिएर नयाँ बसोवासको तयारीमा रहेका छन् ।

६ करोड रुपैयाँ बढी संकलन
यसैगरी, भोटेकोशी बाढी प्रभावितका लागि पूर्व प्रतिबद्धताअनुसारको सहयोग रकम प्राप्त हुने क्रम जारी रहेको छ । भोटेकोशी–रसुवा बाढी २०२६ को वित्तीय प्रतिवेदनअनुसार यस अभियानका लागि कुल ९ करोड १९ लाख ४५ हजार २ सय ७२ रुपैयाँ प्रतिबद्धता प्राप्त भएकोमा हाल ६ करोड २ लाख ३१ हजार रुपैयाँ सहयोग संकलन भएको छ ।