काठमाडौं । आइतबार बिहान काठमाडौंमा यो वर्षको सबैभन्दा कम तापक्रम मापन भएको छ । काठमाडौंमा न्यूनतम तापक्रम ५ दशमलव ४ डिग्री सेल्सियस मापन भएको जल तथा मौसम पुर्वानुमान महाशाखाले जनाएको छ । शनिबार न्यूनतम तापक्रम ५ दशमलव ६ डिग्री सेल्सियस थियो । आइतबारको अधिकतम तापक्रम १९ देखि २१ डिग्री सेल्सियसम्म मात्र रहने छ ।
न्यूनतम र अधिकतम तापक्रम घट्दा बिहान बेलुका चिसो बढेको छ । मुलुकका धेरै ठाउँमा बिहानको समयमा हुस्सु लागेको छ । तराई क्षेत्रलाई समेत बाक्लो हुस्सुले ढाक्न थालेको छ । देशका धेरै ठाउँको मौसम आंशिक बद्ली रहने महाशाखाले जनाएको छ । चिसोका कारण हिमाली भेगमा भने हिमपातको सम्भावना छ ।