काठमाडौं । एकदिवसीय अन्तर्राष्ट्रिय क्रिकेटको वरीयतामा नेपालले दुई स्थान सुधार गरेको छ । अन्तर्राष्ट्रिय क्रिकेट काउन्सिल (आईसीसी) ले बुधवार सार्वजनिक गरेको वरीयतामा नेपालले दुई स्थान सुधार गरेको हो । आईसीसीको एकदिवसीय वरीयताअनुसार नेपाल १७ औँ स्थानमा रहेको छ । यसअघि नेपाल १९ औँ स्थानमा थियो ।
आईसीसी विश्व कप क्रिकेट लिग–२ अन्तर्गत पछिल्लो आठ खेलमध्ये सात खेल जितेको नेपाल वरीयतामा दुई स्थान माथि उक्लिएको हो । नेपालभन्दा पछि अमेरिका, यूएई र पपुवा न्युगिनी ९पीएनजी० क्रमशः १८ औँ, १९ औँ र २० औँ स्थानमा रहेका छन् ।
एकदिवसीय वरीयतामा भारत शीर्ष स्थानमा रहँदा अस्ट्रेलिया, न्युजिल्यान्ड, इङ्ल्यान्ड र पाकिस्तान क्रमशः दोस्रो, तेस्रो, चौथो र पाँचौँ नम्बरमा छन् । टी–२० अन्तर्राष्ट्रिय क्रिकेटको वरीयतामा भने नेपाल १६ औँ स्थानमा यथावत् छ ।