काठमाडौं । निवर्तमान प्रधानमन्त्री तथा नेकपा एमालेका अध्यक्ष केपी शर्मा ओलीले बुधबार अपरान्ह सरकारी निवास बालुवाटार छाड्दैछन् । त्यसपछि उनी निजी निवास बालकोटमा रहनेछन् । उनले बिहान ११ बजे सरकारी निवास छाड्ने योजना छ । प्रधानमन्त्री नेपाली कांग्रेसका सभापति शेरबहादुर देउवा बालुवाटार सर्ने समय भने तय भइसकेको छैन ।
देउवा मंगलबारे राती सपथग्रहण, पदभार ग्रहण र मन्त्रिपरिषद् बैठक सकेर निजी निवास बूढानिलकण्ठ फर्केका छन् । उता, ओलीलाई निजी निवास फर्काउने क्रममा भने एमालेको भातृ संगठन युथफोर्सले आज काठमाडौंमा तामझाम देखाउने भएको छ ।
ओलीलाई बालुवाटारदेखि बालकोटसम्म एमालेको भातृ संगठन युथ फोर्सले स्कर्टिङ गरेर पुर्याउने तयारी गरेको हो । यो कामको नेतृत्व भक्तपुरका सांसद महेश बस्नेतले गर्नेछन् । ओलीलाई दुई हजार गाडी र तीन हजार मोटरसाइकलको लावालस्करको बीचमा राखेर बालुवाटारबाट बालकोट पुर्याइने भएको छ ।