सुर्खेत । कर्णाली प्रदेशसभामा फ्लोर क्रस गरेका सांसदलाई एमालेको प्रदेश संसदीय दलले स्पष्टिकरण सोधेको छ । आज फ्लोर क्रस गरी माओवादी केन्द्रका मूख्यमन्त्री महेन्द्र बहादुर शाहीलाई विश्वासको मत दिएसँगै एमाले भित्र तिब्र मतभेद चुलिएको छ । आजै बसेको एमाले संसदीय दलको बैठकले सांसदहरुसँग स्पष्टीकरण मागेको हो । साथै बैठकले ती सांसदलाई कारबाहीको समेत सिफारिस गरेको छ ।
उता, सांसदहरुले भने कुनै पनि प्रकारको कारवाहीबाट आफुहरु बिचलित नहुने बताएका छन् । केन्द्रमा पार्टी अध्यक्ष केपी शर्मा ओलीले लामो योगदान गरेका नेताहरुमाथि भटाभट कारवाही गर्दै तानशाही प्रवृत्ति देखाएको भन्दै त्यसविरुद्ध उभिने समेत उनीहरुले प्रतिक्रिया दिएका छन् । सांसदहरु प्रकाश ज्वाला, अम्बरबहादुर थापा, नन्दसिंह बुढा र कुर्मराज शाहीले फ्लोर क्रस गरी शाहीलाई मत हालेका हुन् ।