काठमाडौं । कुवेतमा आजदेखि कोरोना भाइरस विरुद्धको खोप लगाउन शुरु गरिने भएको छ । यो मुलुक नेपाली नागरिक बढी रहेको मध्ये एक हो । कुवेत सरकारले वृद्धवृद्धा र अग्रपङ्तिमा खटिएका स्वास्थ्यकर्मीलाई प्राथमिकतामा राखेर खोप वितरण गर्ने भएको छ । खोप देशव्यापी रुपमा सबै नागरिकलाई लगाउने योजना रहेको कुवेती संचारमाध्यमले जनाएका छन् ।
बुधबार मात्र खोपको पहिलो डोज आएको र अब लगाउन थालिने बताइएको छ । मुलुकमा खोप लगाउने अभियान नै चलाउन लागिएको स्वास्थ्य मन्त्री बसेल अल सबाहले बताएका छन् । उनका अनुसार एक, एक महिनाको अवधि वर्षभरि नै खोप भित्राइने भएको छ ।
खोप लगाएसँगै थप मानवीय क्षति नहुने र सङ्क्रमित समेत घट्ने विश्वास स्वास्थ्य मन्त्रीको छ । कुवेतले अन्तर्राष्ट्रिय उडान रोक्दै कोरोना विरुद्धको अभियानलाई समेत कडाई गरिरहेको छ ।