मासाच्युसेट्स
केप कड नेपाली समाजले विगतका वर्षहरूमा जस्तै यसवर्ष पनि समर बारबाक्यू वनभोज कार्यक्रमलाई निरन्तरता दिएको छ। यही जुलाई महिनाको २६ तारिक शनिवारका दिन समाजका कार्यकारी समितिका सदस्य ज्योति के सी को संयोजकत्वमा केप कडको सेन्टरभिलस्थित फ्रेटनल लज प्रांगणमा विहानैदेखि समाजका पदाधिकारी, सदस्यहरू तथा स्यंमसेवकहरू भेला भई विभिन्न परिकारहरू पकाउने बनाउने लगायत विविध कार्यक्रमहरू संचालन गरि बडो हर्षोल्लासका साथ सम्पन्न भएको वनभोज कार्यक्रम, संस्थाका महासचिव ईच्छा खड्काले संचालन गरेका थिए भने संस्थाका वरिष्ठ उपाध्यक्ष विष्णु मान प्रधानले कार्यक्रममा उपस्थित हुनुभएका पाहुनाहरू लगाएत सम्पूर्ण केप कड बासीहरू लाई उक्त बनभोज कार्यक्रममा हार्दिक स्वागत गर्नुभएको थियो।
समाजका युवा संयोजक कुमार तामांग र कार्यकारी सदस्य कुमुदा पोख्रेलले विभिन्न उमेर समुहका सहभागीहरूलाई विभिन्न खेलकुदका गतिविधिहरू गराएर विजेताहरूलाई पुरस्कार वितरण गरेका थिए।
केप कड नेपाली समुदायभित्रबाट यसैवर्ष विभिन्न कलेज तथा विश्वविद्यालयहरूबाट विभिन्न विषयहरूमा दीक्षित हुनुभएका विध्यार्थीहरू श्रुति अमात्य, कृषा अधिकारी, आदर्श राई, सञ्जीव केसी र आकृति विन्दुकार लाई प्रमाण पत्र वितरण गरी सम्मान गरिएको थियो ।
केप कड नेपाली समाजबाट टिका खतिवडाको संयोजनमा स्वास्थ्य क्षेत्रमा कार्यरत विभिन्न तह र तप्काका स्वास्थ्यकर्मिहरूको सामुहिक परिचय गराई गराईएको थियो। कार्यक्रममा वहांहरूको समुहले नेपाली समुदायप्रति स्वयंसेवी भावना र सेवा गर्न तत्परता देखाएका थिए। लोकदोहोरी गायन र बिभिन्न रोचक खेलहरू यसवर्षको वनभोज कार्यक्रमका मुख्य आकर्षण थिए।
कार्यक्रममा म्यासाचुसेट्स राज्यका लागि नेपालका मानार्थ महावाणिज्यदुत श्री प्रलाद केसीज्युको गरिमामय उपस्थितिले केप कड बासी नेपाली समुदायलाई थप हौसला प्रदान गरेको थियो ।
अन्त्यमा, समाजका अध्यक्ष केबी राईले वनभोज कार्यक्रममा आर्थिक सहयोग प्रदानगर्नुहुने सम्पुर्ण दाताहरू लगाएत बिहानैदेखि आफ्नो अमूल्य समय दिएर वनभोज कार्यक्रमको लागि खानपानको ब्यवस्थापन गर्ने टिम, विभिन्न खेलकूद गतिविधिहरू संचालन तथा ब्यवस्थापन गर्ने टिम साथै कार्यक्रममा उपस्थित भई विभिन्न गतिविधिहरूमा सक्रिय सहभागि भैदिनुहुने सम्पूर्ण महानुभावहरूलाई समाजको तर्फबाट हार्दिक धन्यवाद ज्ञापन गरि कार्यक्रमको समापन गर्नुभएको थियो।