काठमाडौं । इक्वेडरविरुद्ध रवाफिलो जित दर्ता गर्दै अर्जेण्टिना कोपा अमेरिका फूटबलको सेमिफाइनल पुगेको छ । आइतबार बिहान सम्पन्न अन्तिम क्वाटरफाइनलमा अर्जेण्टिनाले इक्वेडरलाई ३-० गोल अन्तरले हराएको हो । आजको खेलमा क्याप्टेन मेसी पुनः एक पटक चम्किए । उनले एक उत्कृष्ट फ्रिकिक गोल गरे । दुई गोलका लागि भने असिष्ट गरे । उनले ९३ औं मिनेटमा फ्रिकिकबाट गोल गरेका थिए । खेलको अन्तिम मिनेटमा इक्वेडर १० खेलाडीमा सिमित भएको थियो ।
इक्वेडरका रियरोले डिबक्स नजिकै डिमारियालाई लडाएपछि उनलाई रातो कार्ड दिइएको थियो । यसअघि खेलमा डी पाउलको गोलबाट ४० औं मिनेटमा अर्जेण्टिनाले लिड लियो । ८४ औं मिनेटमा मार्टिनेन्जले अग्रता दोब्बर पारे । अब सेमिफाइनल भिडन्त अर्जेण्टिना र कोलम्बियाबीच हुने छ । कोलम्बियाले आजै राती भएको खेलमा उरुग्वेलाई टाइब्रेकरमा ४–२ गोल अन्तरले हरायो । निर्धारित तथा थप गरिएको समयमा दुवै टिमले गोल गर्न नसकेपछि खेलको निर्णय टाइब्रेकरबाट लिइएको हो । हारपछि उरुग्वे भने प्रतियोगिताबाट बाहिरिएको हो ।