काठमाडौं । १२ औं राष्ट्रिय जनगणनाको मिति तोकिएको छ । यसअघि २५ जेठबाट शुरु भई ८ असारमा सकिनु पर्ने जनगणनाको काम कोरोना भाइरसको महामारीका कारण रोकिएको थियो । सोमबार बसेको मन्त्रिपरिषद्को बैठकले केन्द्रीय तथ्यांक विभागले तयार पारेको जनगणना तालिका स्वीकृत गरेको हो । तालीका अनुसार कात्तिक २५ गतेबाट मंसिर ९ गतेभित्र देशभरि एकसाथ राष्ट्रिय जनगणना हुने गरि तालिका तय भएको हो ।
अब गणक, सपरीवेक्षकसहितका कर्मचारीलाई तालिम दिएर विभागले कार्यस्थलमा खटाउने छ । तालीम कार्यक्रम भदौ र असोजको पहिलो साता सम्म सकिसक्ने तयारी छ । त्यसपछि स्थानीय तहहरुमा जनशक्तिसहित विभागले तयारीको काम थाल्ने छ । असोजभित्र ३९ हजार गणक छनोट गरी कात्तिक १३ गतेबाट चारदिने तालिम दिने तयारी छ । जनगणनामा प्रत्येक घरमा एकजना सुपरिवेक्षक खटिएर घरमुलीबाट विवरण संकलन गरिने छ ।