काठमाडौं । त्रिभुवन विश्वविद्यालयअन्तर्गत व्यवस्थापन संकायको स्नातकोत्तर तहको अन्तिम परीक्षा दुई घन्टा मात्रै हुने निर्णय गरिएको छ । त्रिविका अनुसार कोभिड१९ संक्रमण जोखिमका कारण परीक्षा समय घटाइएको हो । यसअघि स्नातकोत्तर (एमए) व्यवस्थापन संकायको परीक्षा चार घण्टासम्म सञ्चालन हुने गरेको थियो।
कोरोना त्रास कायमै रहेकाले परीक्षा समय घटाउने निर्णय विश्वविद्यालयले गरेको हो । राष्ट्रिय परीक्षा बोर्डले कोरोनाका कारण कक्षा १२ को परीक्षा समय पनि घटाएर डेढ घण्टा तोकेर संचालन गरिसकेको छ ।
सोही प्रकारको व्यवस्थापन त्रिभुवन विश्वविद्यालयले समेत मिलाएको हो । नेपालमा पछिल्लो समय क्रमशः शैक्षिक गतिविधि सूचारु हुन थालेका छन् । संक्रमणको संख्यामा आइरहेको कमी र सक्रिय संक्रमित समेत घटिरहेको समयमा स्वास्थ्य सतर्कता अपनाएर अब शैक्षिक गतिविधि संचालन गर्न दिने निर्णय सरकारले गरिसकेको छ ।