काठमाडौं । दसैं मनाउन काठमाडौं उपत्यकाबाट बाहिर जाने यात्रुलाई लक्षित गरि दशैंको अग्रिम टिकट बुकिंग १० असोजबाट खुल्ने भएको छ । यातायात व्यवस्था विभाग, व्यवसायी, ट्राफिक प्रहरी र प्रशासनबीच शुक्रबार भएको बैठकबाट यस्तो मिति तोकिएको हो । यसअघि यातायात व्यवस्था विभागले असोज दोस्रो सातादेखि बुकिङ खुल्ला गराउने प्रस्ताव गरेको भएपनि यसअघि व्यवसायीसँग सहमति भइसकेको थिएन ।
भाडा समायोजनाका विषयमा अहिले पनि विवाद जारी छ । व्यवसायीले प्रदेशभित्र चल्ने सवारीको समेत भाडा बढाउन सरकारसँग माग गरेका छन् । तर, चाडबाडको समय भएका कारण व्यवसायी समेत तयार भएका हुन् । अर्कोतर्फ व्यवसायीले लामो समय बस थन्काउनु परेको थियो । सोहीकारण मूख्य सिजनमा उनीहरुले बस संचालनको निर्णय गरेका हुन् । प्रदेश सरकारले बढेको भाडा कार्यान्वयन गर्न ढिलाइ गरे पनि दसैंमा २८ प्रतिशतसम्म भाडा बढाएर लिन पाउनु पर्ने माग व्यवसायीले गरेका छन् ।