भरतपुर । चितवनमा कोरोना भाइरसको संक्रमणका कारण एक जनाको ज्यान गएको छ । चितवनको भरतपुर अस्पतालमा कोरोना संक्रमण पुष्टी भएका एक जना व्यक्तिको उपचारका क्रममा मृत्यु भएको हो । मृत्यु भएका व्यक्ती भरतपुर नगरपालिका ११ का भएको अस्पतालले जनाएको छ । उनी ६८ वर्षका पुरूष हुन् । अस्पतालका अनुसार उनको शुक्रबारदेखि नारायणी सामुदायिक अस्पतालको आइसियूमा उपचार भइरहेको थियो।
उनमा कोरोना संक्रमण देखिएपछि सोमबार साँझ ७ बजे भरतपुर अस्पताल ल्याइएको थियो । उक्त अस्पतालको कोभिड आइसियूमा राखेर उपचारका क्रममा उनको मंगलबार बिहान ७ बजेर ५ मिनेटमा ज्यान गएको हो । मृतक सुगर तथा प्रेसरको समस्याबाट ग्रसित रहेको बताइएको छ ।
शरीरमा कोरोनाको संक्रमण देखिएको र निमोनियाले समेत च्यापेपछि उनको ज्यान गएको अस्पतालको भनाई रहेको छ । नेपालमा यो कारोनाको १५ औं मृत्यु हो । पछिल्लो दिनमा नेपालमा संक्रमित र यसबाट ज्यान गुमाउने मानिसको संख्या समेत बढ्दो क्रममा रहेको छ ।