काठमाडौं । नेपालमा कोरोना भाइरस विरुद्ध दोस्रो चरणको खोप अभियान आजबाट शुरु हुनेछ । यस अभियानका दौरान देशभरका ६५ वर्ष माथिका करीव १६ लाख नागरिकले खोप पाउने भएका छन् । साथै यसै चरणमा हिमाली जिल्लाका ५५ वर्ष माथिका सबैले खोप लगाउन सक्ने भएका छन् । नेपालमा १४ माघबाट खोप लगाउन थालिएको हो ।
स्वास्थ्य तथा जनसंख्या मन्त्रालयले यसअघिको प्राथमिकतामा परिवर्तन गर्दै ६५ वर्ष माथिका नागरिकलाई मात्र खोप लगाउन लागेको हो । यसअघि ५५ वर्ष माथिका सबैलाई खोप दिने तयारी थियो । आज प्रधानमन्त्री केपी शर्मा ओलीले खोप लगाएर दोस्रो चरणको अभियानको प्रारम्भ गर्ने भएका छन् ।
उनी १० बजे त्रिवि शिक्षण अस्पताल महाराजगञ्ज पुग्ने कार्यक्रम छ । देशभर स्थापना गरिएका ६ हजार खोप केन्द्रबाट खोप लगाइने भएको छ । भारतबाट नेपालले किनेको कोभिशिल्ड खोप नेपालमा वितरण हुँदैछ ।