काठमाडौं । नेपालमा आजबाट अन्तर्राष्ट्रिय हवाई उडान बन्द भएको छ । सरकारले नेपालमा बढ्दो महामारी नियन्त्रणका लागि बिहीबार राति १२ बजेबाट लागु हुने गरि भारतसँग सातामा दुई उडानबाहेक सबै अन्तर्राष्ट्रिय हवाई उडान बन्द गर्ने निर्णय गरेको छ ।
पहिलो चरणमा वैशाख मसान्तसम्म हवाई उडान बन्द हुने नेपाल नागरिक उड्डयन प्राधिकरणले जनाएको छ । आज अन्तिम दिन अन्तर्राष्ट्रियतर्फ कुल ५१ वटा उडान, अवतरण भएको विमानस्थल कार्यालय जनाएको छ । यो कोरोना महामारीपछिको सामान्य दिनको तुलनामा करिब दोब्बर हो ।
भारतसँग भने एयर बबल सम्झौताअनुसार दुबै मुलुकका राष्ट्रिय ध्वजाबाहक वायुसेवा कम्पनीले सातामा एक, एक उडान जारी राख्ने भएका छन् । सरकारको यो निर्णयको भने आलोचना भएको छ । सुरक्षित मानिएका मुलुकमा उडान बन्द गरेर सरकारले भारतमा जारी राखेको भन्दै आलोचना भएको हो । भारतबाट आएका यात्रु १० दिन अनिवार्य होटेल क्वारेन्टिनमा बस्नु पर्छ । सरकारले होटेल समेत तोकेको छ ।