धनगढी । प्रधानमन्त्री शेरबहादुर देउवाले बाढी पहिरो प्रभावितलाई राहत तथा पुनस्र्थापनाको प्याकेज आउने आवश्वासन दिएका छन् । त्यसका लागि योजनाबद्ध ढंगले कार्यक्रम अगाडि बढाइने उनले बताए । बिहीबार बाढी र पहिरोले प्रभावित भएको जिल्लाहरुको भ्रमणका लागि सुदुरपश्चिममा निस्किएका प्रधानमन्त्रीले बाढीका कारण देशभरि ठूलो मात्रामा जनधनको क्षति भएकाले सरकार गम्भीर रहेको बताए । कञ्चनपुरको दोधाराचाँदनी नगरपालिका ९ मा आयोजित कार्यक्रममा देउवाले बाढी प्रभावितलाई सम्बोधन गरिने आश्वासन दिएका हुन् ।
उनले आफु काठमाडौं फर्किएपछि उचित सम्बोधनसहित राहत प्याकेज ल्याउने उनले बताए । प्रधानमन्त्री बिहीबार धनगढीमै बास बसेका छन् । बिहीबा दिउँसो भने उनी विभिन्न पहाडी भेगको भ्रमणमा गएका थिए । उनी नेपाली सेनाको विशेष हेलिकोप्टरमा सो भेगको भ्रमणमा गएका हुन् । उनको साथमा अर्थमन्त्री जनार्दन शर्मा, पर्यटन मन्त्री प्रेम आलेसहितका मन्त्रीसमेत सहभागी भए । उनले आजै पहाडी जिल्ला बझाङ, डोटी, बैतडी र डडेलधुरा निरीक्षण गरेका हुन् । कञ्चनपुर पुगेका देउवाले महाकाली तटीय क्षेत्रको भने हेलिकप्टरबाट निरीक्षण गरे ।