काठमाडौं । मुलुकको अर्थतन्त्रको बारेमा नकारात्मक टिप्पणी गरेको भन्दै आलोचना भैरहेको समयमा प्रधानमन्त्री शेरबहादुर देउवाले गभर्नर महाप्रसाद अधिकारीलाई बालुवाटार बोलाएर छलफल गरेका छन ।
देउवा आज गर्भनर अधिकारीलाई बोलाएर मुलुकको पछिल्लो आर्थिक अवस्थाको बारेमा कुराकानी गरेका हुन । अर्थमन्त्री जनार्दन शर्माले राजीनामा दिएपछि सो मन्त्रालयको जिम्मेवारी पनि प्रधानमन्त्रीसमेत रहेका शेरबहादुर देउवाले लिएका छन् ।
विभागीय मन्त्रीको रुपमा उनले गर्भनर अधिकारीलाई बोलाएर पछिल्लो अवस्थाका बारेमा जानकारी लिएका हुन । भेटमा प्रधानमन्त्री देउवाले मुलुक श्रीलंका बन्ने बाटोमा रहेको भन्दै गर्भनर अधिकारीले सार्वजनिक रुपमा दिएका अभिव्यक्तिका विषयमा चासो समेत राखेका छन ।
गर्भनर अधिकारीले भने आफूले केन्द्रीय बैंकको प्रमुखको रुपमा अर्थतन्त्र सुधारका लागि पहल र सरोकारवाललाई ध्यानाकर्षण गराउने काम मात्रै गरेको सो क्रममा बताएका छन ।
गर्भनर अधिकारी नेकपा एमालेको अर्थ विभागको सदस्यका रुपमा काम गरिरहेको भन्दै राजीनामा माग हुँदै आएको समयमा प्रधानमन्त्री देउवाले गर्भनरसँग सो विषयमा पनि चासो राखेको बुझिएको छ । प्रतिनिधि सभा र राष्ट्रिय सभामा समेत उनको राजीनामा माग हुँदै आएको छ ।