बाग्लुङ । बाग्लुङमा दुई छुट्टाछुट्टै स्थानमा पहिरो जाँदा तीन जनाको मृत्यु भएको छ । शुक्रबार राती पहिरोले निसीखोला गाउँपालिकामा दुई बालक र एक वृद्धाको मृत्यु भएको हो । गाउँपालिकाको वडा नम्बर ५ मा हिराबहादुर विकको घर शुक्रबार राति भत्किदा दुई बालकको घटनास्थलमै मृत्यु भएको छ । प्रहरीका अनुसार मृत्यु हुनेमा हिराबहादुरका नाती १४ वर्षीय वीरेन्द्र र मामाघर आएका नाति ६ वर्षीय प्रवेश विकको मृत्यु भएको छ ।
हिराबहादुरकी ५२ वर्षीया श्रीमती दिलसरा घाइते छन् । घटनास्थलमा प्रहरी रु स्थानीयले उद्धार गरेका थिए । उता, शनिबार बिहान निसीखोला–३ धारखर्कमा पहिरोले एक घर पुरिँदा ७२ वर्षीया ओली कामीको ज्यान गएको छ । यस घटनाको थप विवरण आउन बाँकि रहेको स्थानीय प्रहरीले जनाएको छ ।