कर्नाटक । भारतीय केन्द्रीय रक्षामन्त्री श्रीपाद नाइक गम्भीर सवारी दुर्घटनामा परेका छन्। उनी सवार कार दुर्घटनामा मन्त्री गम्भीर घाइते भएको र श्रीमती तथा स्वकीय सचिवको भने ज्यान गएको भारतीय संचारमाध्यमले लेखेका छन् । मन्त्री नाइकको कार सोमबार कर्नाटकको अंकोलामा दुर्घटनामा परेको हो ।
पत्नी विजया नाइक र स्वकीय सचिवको ज्यान गएको र मन्त्री नाइक गम्भीर घाइते भएको बताइएको छ । मन्त्री नाइकको अहिले अंकोला जिल्ला अस्पतालमा उपचार जारी छ । अवस्था स्थिर रहेको चिकित्सकले जनाएका छन् । उनी पत्नीसहित गोकर्ण गइरहेका थिए ।
येल्लापुर र गोकर्णबीचको सडक खण्डमा उनी सवार कार दुर्घटनामा परेको हो । कर्नाटकको येल्लापुरस्थित गणपति, कवादिकरे, पंडवासी ग्राम दीवी मन्दिर र ईश्वर मन्दिरमा पुजा गरेर फर्किदा कार दुर्घटनामा परेको संचारमाध्यमले लेखेका छन् । उनको दुर्घटनापछि केन्द्रीय स्तरका नेताहरुले स्वास्थ्य लाभको कामना गरेका छन् ।