भारतबाट पहिलो पटक निजी कार्गो रेल नेपाल आयो

वीरगन्ज । भारतबाट नेपालमा पहिलो पटक निजी कार्गो रेल आइपुगेको छ । यसअघि भारतीय सरकारी रेल्वेले मात्र नेपाली सामान बोक्न पाउने प्रावधान थियो । दुई मुलुकबीचको सम्झौतापछि निजी कार्गो रेल आउने बाटो खुलेको हो । भारतको हल्दियाबाट सो रेल बुधबार विहान १०ः१५ बजे वीरगञ्जको सिर्सियामा रहेको सुख्खा बन्दरगाहमा आइपुगेको हो । भारतसँग निजी कार्गो रेल नेपालको सीमासम्म ल्याउने विषयमा गत असार २५ गते सभ्झौता भएको थियो । अहिले निजी क्षेत्रले सातामा दुई दिन सेवा दिने भएको छ । यसबाट अब निजी क्षेत्रले प्रतिस्पर्धी मूल्यमा सामान ल्याउन सक्नेछ । जसका कारण सामान सस्तो हुने अपेक्षा गरिएको छ ।