काठमाडौं । भारत र चीनबीच चर्किएको सीमा विवादका बीच यी दुई मुलुकको बीचमा रहेको मुलुक नेपालले औपचारिक धारणा सार्वजनिक गरेको छ । परराष्ट्र मन्त्रालयले शनिबार एक विज्ञप्ति सार्वजनिक गर्दै समस्या समाधानमा शान्तिपूर्ण उपायको खोजी गर्न दुबै मुलुकलाई आग्रह गरिएको छ ।
दुई देशबीचको विवाद शान्तिपूर्ण तरिकाबाट समाधान हुनुपर्ने नेपालको अडान यहाँ दोहोर्याइएको छ । नेपाल जहिले पनि क्षेत्रीय र विश्व शान्तिको पक्षमा रहेको मन्त्रालयको भनाई छ । परराष्ट्र मन्त्रालयले गलवान उपत्यकामा देखिएको विवाद दुवै देशले शान्तिपूर्ण तरिकाबाट समाधान खोज्ने विश्वास लिएको छ ।
भारत र चीनको सीमा विवादका दौरान लद्दाखमा २० भारतीय सैनिक मारिएका छन् । यसबाहेक अन्य कैयौं घाइते भएको बताइएकोे छ । चीनतर्फको क्षति भने सार्वजनिक भएको छैन ।