मस्कोबाट गोवा उडेको जहाजमा बमको हल्ला, आकस्मिक अवतरण

नयाँ दिल्ली । रुसको मस्कोबाट गोवाका लागि उडेको जहाजमा बम राखेको हल्लासँगै जहाजको आकस्मिक अवतरण गरिएको छ । बम रहेको सूचनापछि रूसको मस्कोबाट भारतको गोवातर्फ आइरहेको एक चार्टर्ड जहाज सोमबार राति गुजरातको जमनगरमा आपतकालीन अवतरण गराइएको हो । समाचार एजेन्सी पीटीआईका अनुसार विमानमा सवार सबै २३६ यात्रु र चालक दलका सदस्यलाई सुरक्षित बाहिर निकालेर प्रहरी र बम डिस्पोजल टोलीले विमानको जाँच गरेको थियो ।
नयाँ दिल्लीस्थित रूसी दूतावासका एक अधिकारीले भारतीय अधिकारीका तर्फबाट विमानमा बम रहेको सूचना दिएका थिए । अधिकारीहरू अनुसार बम रहेको धम्कीपछि विमानलाई सोमबार राति ९ः४९ बजे जामनगरको सेनाको ब्यारेकमा अवतरण गराइएको थियो। अहिले सबै यात्रु सुरक्षित छन्।