काठमाडौं । नेपाल कम्युनिस्ट पार्टी (माओवादी केन्द्र) को केन्द्रीय समिति बैठक आजबाट शुरु हुँदैछ । बिहान ११ बजेदेखि राष्ट्रिय सभा गृहमा बैठक आयोजना गरिएको बैठकमा पार्टी भित्र एमसीसी पास भएपछि देखिएको असन्टुष्टीले बढी प्राथमिकता पाउने देखिएको छ । नेता नारायणकाजी श्रेष्ठ समूहले एमसीसीको चर्को विरोध गरिरहेको छ । बैठकमा साङ्गठनिक एवं समसामयिक राजनीतिका विषयमा छलफल हुने बताइएको छ ।
गत पुस १८ गते सम्पन्न महाधिवेशनले तय गरेको भावी कार्यदिशाबारे बैठकले कार्यनीति तय गर्ने छ । बैठकमा स्थानीय निर्वाचनको तयारी र रणनीति समेत तय गर्ने पार्टीको भनाई छ । बैठकबाट पदाधिकारी चयन टुग्याउने तयारी छ । सङ्गठनात्मक कार्य विभाजनको काम समेत यसै बैठकले गर्ने भएको छ । आठौँ महाधिवेशनले २४७ केन्द्रीय सदस्य चयन गरेको थियो ।