काठमाडौं । पश्चिम अफ्रिकी देश मालिमा सैन्य कु भएको छ । सैनिकले त्यहाँका राष्ट्रपति र प्रधानमन्त्रीलाई कब्जमा लिएका छन् । राष्ट्रपति इब्राहिम बुबाकार केयटाले सैन्य हिरासतबाटै राजीनामाको घोषणा गरेको सैनिक समर्थक स्रोतले जानकारी गराएको छ ।
बीबीसीका अनुसार सैन्य कब्जामै रहेको अवस्थामा उनले टेलिभिजन सम्बोधन गरेका छन् । जहाँ उनले सरकार र संसद् समेत भङ्ग भएको बताएका छन् । उनले भनेका छन्, म आफूलाई शक्तिमा राखिरहन रगत नबगोस् भन्ने चाहन्छु।
सैनिकले राष्ट्रपति, प्रधानमन्त्रीसहित उच्च सरकारी अधिकारीलाई कब्जा गरेर सेनाको अखडाा राखेका छन् । मालिमा भएको सैन्य कुको भने विश्वव्यापी आलोचना शुरु भएको छ ।
उनीहरूलाई मालीको राजधानी बमाकोबाट करिब १५ किलोमिटर टाढा रहेको कटीस्थित एउटा मुख्य सैन्य शिविरमा राखिएको बीबीसीले उल्लेख गरेको छ । सेनाले राष्ट्रपतिका छोरा, माथिल्लो सदनका सभामुख, विदेशमन्त्री र अर्थमन्त्रीलाई समेत कब्जामा लिएको थियो ।
सैनिक समर्थकले सडकमा खुसीयाली समेत बनाएका छन् । यस घटनामा कटी सैनिक छाउनीका उपप्रमुख कर्णेल मलिक डिव र अर्का कमान्डर जनरल सादिओ कमाराको हात रहेको दावि गरिएको छ । एजेन्सी