काठमाडौं । मिस नेपाल २०२२ को फाइनल आज हुने भएको छ । शनिबार ललितपुरस्थित गोदावरी हलमा मिस नेपालको ग्रान्ड फिनाले हुन लागेको हो । जहाँ २४ जना सुन्दरी ताजको प्रतिस्पर्धामा छन् । कोरोना महामारीको कारण अघिल्ला दुई वर्षमा रोकिएको मिस नेपाल यसपटक भने भौतिकरुपमै आयोजना हुन लागेको हो । द हिडन ट्रेजरले यसपटकको संस्करणलाई भव्य बनाउने बताएको छ । यस पटक ६ जना चिकित्सक मिस नेपालको प्रतिस्पर्धामा छन् ।
मिस नेपाल वर्ल्ड, मिस नेपाल इन्टरनेसनल र मिस नेपाल अर्थ यसै प्रतियोगिताबाट छानिनेछन् । मुख्य तीन टाइटल र त्यसपछि थप ९ वटा सब(टाइटलको विजेता आज घोषणा गरिनेछ । ११ जना निर्णायकले अन्तिम विजेता घोषणा गर्नेछन् । नयाँ विजेतालाई मिस नेपाल नम्रता श्रेष्ठले ताज पहिर्याउने छिन् । फिनालेमा गीत तथा नृत्य प्रस्तुतिसमेत दिइनेछ । देशभरबाट आएका ८ सय सुन्दरीबाट अन्तिम छनोट हुन लागेको हो ।