मौद्रिक नीतिमार्फत सरकारले भन्यो : रेमिट्यान्सलाई बैंकमा राखे अतिरिक्त एक प्रतिशत ब्याज पाइने

काठमाडौं । रेमिट्यान्सलाई औपचारिक च्यानलबाट भित्राउन र त्यसको औपचारिक क्षेत्रमै उपयोग बढाउन सरकारले प्रोत्साहन गर्ने भएको छ । मौद्रिक नीति सार्वजनिक गर्दै केन्द्रिय बैंकले विदेशबाट नेपाली श्रमिकले पठाउने रेमिट्यान्स रकम बैंक तथा वित्तीय संस्थामा जम्मा गरे एक प्रतिशत थप ब्याज दिने घोषणा गरेको हो । नेपाल राष्ट्र बैंकले जारी गरेको मौद्रिक नीतिमा वैदेशिक रोजगारीमा रहेका नेपालीलाई बैंकिङ च्यानलबाट पठाएर बचत गरेमा थप ब्याज दिने व्यवस्था गरेको उल्लेख छ । गभर्नर महाप्रसाद अधिकारीले शुक्रबार नीति सार्वजनिक गरेका छन् । बैंकिङ च्यानलबाट आएको रेमिट्यान्स रकम बैंक तथा वित्तीय संस्थामा राखेमा थप एक प्रतिशत ब्याजदर दिने व्यवस्था गर्ने अधिकारीको भनाई छ ।