काठमाडौं । रुस–युक्रेन युद्ध शुरु भएयता ५११ जना नेपाली नागरिक सम्पर्कमा आएका छन् । उनीहरु सुरक्षित स्थानमा पुगेको परराष्ट्र मन्त्रालयले जनाएको छ । रुस–युक्रेन द्वन्द्व प्रभावित नेपालीको सहयोग एवं उद्धार उच्च स्तरीय समितिलाई उदृत गर्दै संचारमाध्यमले जनाए अनुसार ५११ जना नेपाली नागरिक युक्रेनबाट सुरक्षित गन्तव्यमा पुगेका छन् । यसमध्ये ४०३ जना पोल्यान्ड, ७१ जना स्लोभाकिया, २७ जना रोमानिया, छ जना हङ्गेरी र चार जना नेपाली नागरिक माल्दावामा सुरक्षित छन् । तीमध्ये चार जनामा युद्धको विकराल परिस्थितिको सामना गर्नुपर्दा मानसिक समस्या देखिएको समितिको भनाई छ ।
युक्रेनमा रहेका धेरैजसो नेपाली तथा अन्य विदेशी नागरिक घण्टौँ पैदल हिँडेर युक्रेन र अन्य देशको सीमा क्षेत्रमा स्थापना गरिएको शरणार्थी क्याम्प पुगेका छन् । युक्रेनबाट बाहिरिएका मध्ये ४० जना नेपालीले मात्र यात्रा अनुमतिपत्र लिएको जर्मनस्थित नेपाली राजदूत रामकाजी खड्काले जानकारी गराएका छन् ।
समितिका संयोजक तथा गैरआवासीय नेपाली सङ्घका उपाध्यक्ष बद्री केसीले युक्रेनमा स्थायी रूपमा बसोवास गरिरहेका ४० जनाको परिवारले युक्रेन छाड्न नसकेको बताएका छन् । यद्दपी युक्रेनमा ठ्याक्कै कति नेपाली थिए भन्ने खुलेको छैन । रुसले युक्रेनमा आक्रमण गरेयता झण्डै १० लाख मानिस विस्थापित बनिसकेका छन् ।