काठमाडौं । नेपाली शेयर बजार निरन्तर घट्दो क्रममा रहेको छ । बजेटपछि लगातार नेप्से परिसूचक घट्न थालेपछि लगानीकर्तामा निराशा छाएको छ।
लगानीकर्ता अन्योलमा देखिएका छन् । साना लगानीकर्ता बजारमा त्यति खुल्ल सकेका छैनन्।
बजार निरन्तर घट्न थालेपछि लगानी नै डुब्ने चिन्तामा उनीहरु रहेको देखिन्छ। सरकारले आगामी आर्थिक वर्ष २०७९/८० को बजेट ल्याएपछि बढ्ने आशा गरेको शेयर बजार लगातार ओरालो लागेको छ ।
लगानीकर्ताले बजारप्रति विश्वस्त हुने आधार नभेट्दा बजार ओरालो गतिमा नै देखिएको छ।
नेपाल पुँजी बजार लगानीकर्ता संघका पदाधिकारीसँग बालुवाटारमा भएको भेटमा आइतबार प्रधानमन्त्री देउवाले नेपाल राष्ट्र बैंकका गभर्नर महाप्रसाद अधिकारीलाई पुँजीबजारमा देखिएका समस्या तत्काल समाधान गर्न निर्देशन दिएका थिए।
समस्या समाधानको पहलमा लाग्न निर्देशन दिँदासमेत शेयर बजारमा सुधार देखिन सकेको छैन। साताको कारोबारको पहिलोदिन आइतवार नेप्से १२.९२ अंकले घटेर २०६५.७८ विन्दुमा आइपुगेको छ ।
यसदिन २२८ कम्पनीको १ अर्ब २७ करोड ३३ लाख ८५ हजार २७६ रुपैयाँ बराबरको ४४ लाख ९ हजार ६९१ कित्ता शेयर किनबेच भएको छ । अघिल्लो दिनको तुलनामा कारोबार रकम घटेको छ ।
शुक्रवार १ अर्ब ३० करोड ७३ लाख ५९ हजार ५४० रुपैयाँ बराबरको कारोबार भएको थियो । आज कारोबारमा आएका १३ वटा समूहमध्ये ६ समूहको परिसूचक बढेको छ भने ७ समूहको परिसूचक घटेको छ ।
माइक्रोफाइनान्स समूह सबैभन्दा धेरै ०.५४ प्रतिशतले बढेको छ भने जीवन बीमा समूह २.०१ प्रतिशतले घटेको छ । दोहोरो अंकले घटेको बजारमा आज हिमालयन बैंकको शेयर मूल्यमा नेगेटिभ सर्किट लागेको छ । यसका सेयरधनीले करिब १० प्रतिशत गुमाएका छन् ।
त्यसैगरी, महुली लघुवित्त ७.६६, नेपाल लाइफ र मनकामना स्मार्ट लघुवित्त ३.९२, गुँरास लघुवित्त ३.८६, ग्लोबल आइएमई बैंक ३.६१, अजोड इन्स्योरेन्स, एशियन लाइफ, सिभिल बैंक र लाइफ इन्स्योरेन्स कर्पोरेशनको शेयरमूल्य साढे २ प्रतिशतभन्दा धेरैले बढेको छ ।
घट्दो बजारमा आज दुई कम्पनीको शेयर मूल्यमा भने पोजेटिभ सर्किट लागेको छ । उपकार लघुवित्तको सेयर मूल्य ठ्याक्कै १० प्रतिशतले बढेको छ भने बलेफी हाइड्रोपावरकोयसका शेयरधनीले करिब १० प्रतिशत कमाएका छन् ।
आज एशियन लाइफ इन्स्योरेन्सको सर्वाधिक कारोबार भएको छ । यसको ८ करोड रुपैयाँ बढीकोे शेयर किनबेच भएको छ । त्यसैगरी, एनआइसी एशिया बैंक पौने ७ करोड र नेपाल लाइफको साढे ६ करोड बढीको कारोबार हुँदै शीर्ष तीनमा रहे ।