काठमाडौं । विश्वकप २०२२ र एसियन कप २०२३ अन्तर्गत भएको नेपालले चाइनिज ताइपेईविरुद्ध सानदार जित निकालेको छ । प्रतियोगितामा ताइपेईलाई दोस्रो पटक हराउने क्रममा नेपालले २–० को जित निकाल्यो ।
समूह बी अन्तर्गत कुवेतको जाबेर अहमद इन्टरनेशनल स्टेडियममा भएको खेलमा नेपालका लागि अन्जन विष्ट र नवयुग श्रेष्ठले गोल गरे । खेलको तेस्रो मिनेटमै प्राप्त पेनाल्टीमा अन्जनले गोल गर्दै नेपाललाई अग्रता दिलाएसँग नेपाल शुरुवातमै दवाव सिर्जना गर्न सफल भएको थियो ।
२०१९ मा भएको छनोटकै खेलमा नेपालले चाइनिज ताइपेईलाई २–० ले हराएको थियो । दोस्रो हाफमा नेपालले एक गोल थप्यो । सुनिल बलको स्थानमा दोस्रो हाफमा मैदान प्रवेश गरेका नवयुगले त्रिभुवन आर्मी फुटबल क्लबका टिममेट सुमन अर्यालको क्रसमा गोल गरेका हुन् ।
समूह बी मा दोस्रो जितपछि नेपालले ६ खेलबाट ६ अंक जोडेको छ । नेपाल प्रतियोगितामा जेठ २४ मा जोर्डन र जेठ २८ मा अष्ट्रेलियासंग खेल्दैछ । तीन वटै टीम नेपालभन्दा बलियो छन् ।