काठमाडौं । सरकारले नेपालमै कोरोना विरुद्धको खोप उत्पादन गर्ने ल्याव स्थापनाको घोषणा गरेको छ । अहिले नेपालले अन्य मुलुकमा बनिरहेको खोप विभिन्न माध्यमबाट ल्याउँदै नागरिकमा वितरण गरिरहेको छ । गठबन्धन सरकारले नेपालमै कोभिड–१९ को भ्याक्सिन उत्पादन गर्ने ल्याब स्थापनाको लक्ष्य साझा न्यूनतम कार्यक्रममा राखिएको छ ।
सरकारले आइतबार कार्यक्रम सार्वजनिक गरेको हो । कार्यक्रममा कोभिड–१९ बाट उपन्न महाविपत्तिबाट मुक्ति पाउन ल्याब स्थापनाको लक्ष्य राखेको बताएको छ । विश्वमा कुनै एक मुलुकले पत्ता लगाएको सुत्रका आधारमा सोही सुत्र प्रयोग गरि विभिन्न ल्यावमा खोप उत्पादन गर्न सकिन्छ । सरकारले असोज महिनासम्ममा एक तिहाई नागरिकलाई र चैत मसान्तसम्म खोप लगाउनयोग्य सबै नेपालीलाई निःशुल्क खोपको लगाइसक्ने लक्ष्य राखेको छ ।
स्वास्थ्यकर्मी, अस्पतालका कर्मचारी, एम्बुलेन्स चालक, सफाई मजदुर तथा सुरक्षाकर्मीहरूलाई प्रोत्साहन भत्ता र आवश्यकताअनुसार व्यक्तिगत सुरक्षा साधन उपलब्ध गराउने कार्यक्रममा उल्लेख छ । कोभिड नियन्त्रणका लागि आवश्यक पूर्वाधारमा प्राथमिकता दिने, स्वास्थ्य सामग्री खरिदमा भएको अनियमितता छानबिन गर्ने र दोषी देखिएका व्यक्ति तथा संस्था उपर कानुनी कारबाही गर्ने समेत लक्ष्य सरकारको छ ।