काठमाडौं । प्रधानमन्त्री पुष्पकमल दाहाल ‘प्रचण्ड’लाई विश्वासको मत दिएको राष्ट्रिय स्वतन्त्र पार्टी (रास्वपा) मन्त्रालयको बाँडफाँट टुंग्याउने सत्ता साझेदार दलहरुको बैठकमा भने अनुपस्थित भएको छ।
कांग्रेसबाट सभापति शेरबहादुर देउवा र उपसभापति पूर्णबहादुर खड्का, माओवादी केन्द्रबाट प्रधानमन्त्री प्रचण्डका साथै उपप्रधानमन्त्री नारायणकाजी श्रेष्ठ, एकीकृत समाजवादीबाट अध्यक्ष माधवकुमार नेपाल र महासचिव घनश्याम भुसाल सहभागी छन्।
यस्तै, लोकतान्त्रिक समाजवादी पार्टीबाट अध्यक्ष महन्थ ठाकुर र नेता शरतसिंह भण्डारी, नेपाल समाजवादी पार्टीका तर्फबाट अध्यक्षद्वय बाबुराम भट्टराई र महेन्द्र राय यादव, नागरिक उन्मुक्ति पार्टीबाट रञ्जिता श्रेष्ठ र अरुण चौधरी, जनमत पार्टीबाट सीके राउत, राष्ट्रिय जनमोर्चाका चित्रबहादुर केसी, जनता समाजवादी पार्टी (जसपा)बाट राजेन्द्र श्रेष्ठ र आम जनता पार्टीबाट प्रभु साह सहभागी छन्।
रास्वपाले पहिले प्राप्त मन्त्रालय नै पाउँदा सरकारमा सहभागी हुने जनाएको छ। सत्ता गठबन्धनमा दलहरुको संख्या बढेका कारणले प्रचण्डले दुईटा मन्त्रालय लिन प्रस्ताव गरेको बुझिएको छ।