न्युयोर्क
अमेरिकामा सकृय सिन्धु-अमेरिका कल्याणकारी समाजले सिन्धुपाल्चोक जिल्लाको जुगल गापा- २ लिदीमा गएको पहिरोबाट पिडित समुदायलाई रु. ४ लाख आर्थिक सहयोग तयारी गरेको छ । उक्त पहिरोको प्रत्यक्ष मारमा परेका ३७ घरधुरीलाई अगष्ट १५ तारिखको संस्थाको निर्णय अनुसार रकम नेपाल पठाउने तयारी गरेको हो ।
सिन्धुपाल्चोकमा अविरल वर्षासँगै आएको पहिरोमा परि हालसम्म १७ जनाको मृत्यु भइसकेको छ भने २२ जना हराइरहेका छन् । त्यसैगरी घाइते ६ जनाको उपचार भइरहेको छ । सिन्धु-अमेरिका कल्याणकारी समाजका अध्यक्ष छिरिङ् तेन्जिङ लामाले गाउँबासीलाई पर्न गएको पिडाले आफुलाई बिक्षिप्त महसुस गराएको बताउँदै सँस्थाले सो घाउमा केही मल्हम लगाउनु सबैको दायित्व भएको समेत बताए ।
सो सम्वन्धमा समाजले एक प्रेस बिज्ञप्ति जारी गर्दै बाढी पिडितका मृतकको दिवंगत आत्माको चिरशान्तिको कामना र शोकाकुल परिवारजनमा समबेदना व्यक्त गरेका छन् ।