काठमाडौं । सत्ता गठबन्धनमा सिट बाँडफाँट गर्न गठन भएको कार्यदलको पहिलो बैठक सोमबार सम्पन्न भएको छ । बैठकमा सीटबारै औपचारिक छलफल भने नभएको नेताहरुले बताएका छन् । २० साउनमा बसेको पाँचदलीय गठबन्धनका शीर्ष नेताहरुको बैठकले ४ मंसिरको प्रदेश र प्रतिनिधिसभा चुनावमा तालमेल गर्ने निर्णय गर्दै कार्यदल बनाएको थियो । कार्यदलको पहिलो बैठक सोमबार दिउँसो बालुवाटारमा बसेको हो । आजको बैठकमा कसरी जाने, के आधार र कुन मापदण्डमा जाने भन्ने बारे छलफल भएको बताइएको छ ।
बैठकमा माओवादी नेताहरुले एमाले र माओवादीले विगतमा गरेको गठबन्धनको अनुभव सुनाएका थिए । कार्यदलको बैठकले कांग्रेसका पूर्वमहामन्त्री कृष्णप्रसाद सिटौलालाई संयोजक तोकेको छ । ११ सदस्यीय कार्यललमा कांग्रेसका तीन सदस्य छन् भने अरु दलका २–२ जना छन् । कार्यदललाई साउन मसान्तभित्र सिट बाँडफाँटबारे सहमति जुटाएर प्रतिवेदन बुझाउन भनिएको छ ।