काठमाडौं । स्थानीय तह निर्वाचनमा देशभर १ लाख ३७ हजारको उमेदवारी परेको छ । यो बिहान ८ः३० बजेसम्मको अपडेट हो । निर्वाचन आयोगले तथ्यांक अध्यावधि भइरहेको जनाएको छ । सोहीकारण यो संख्या अझै बढ्ने सम्भावना छ । मंगलबार बिहानसम्मको तथ्यांक अनुसार सबै पदमा कुल १ लाख ३७ हजार ५८ जनाले मनोनयन दर्ता गराएका छन् ।
देशभर २९३ नगरपालिकामा ३ हजार २७६ जनाले नगरप्रमुख (मेयर) पदमा उम्मेद्वारी दिएका छन् । उपप्रमुख (उपमेयर) पदमा २ हजार ९ जनाको मनोनयन परेको छ । ४६० गाउँपालिकामा अध्यक्षका लागि ३ हजार २६४ जनाको मनोनयन परेको छ । २ हजार २९७ जनाले उपाध्यक्षमा उम्मेद्वारी दिएका छन् । कुल ३५ हजार २२१ पदमा वैशाख ३० मा निर्वाचन हुँदैछ ।