काठमाडौं । सरकारले ३० वैशाखमा तोकेको स्थानीय तह निर्वाचनमा हरियो रङ्गको चुनाव चिन्ह हुने भएको छ । स्थानीय तह निर्वाचनका लागि आवश्यक मतपत्र छपाई गर्दा मतपत्रमा छपाई हुने चिन्ह, विवरण तथा सुरक्षा चिन्हहरु हरियो मसीले छपाई गर्ने निर्णय गर्ने सोमबार पत्रकार सम्मेलनमार्फत आयोगले जानकारी गराएको छ । स्थानीय तहको निर्वाचनका लागि आवश्यक मतपत्र छपाइ गर्दा मतपत्रमा छपाइ हुने चिन्ह, विवरण तथा सुरक्षा चिन्हहरु हरियो एसके–३०८१ स्पेक्ट्रम ब्राइट ग्रिन मसिले छपाइ गर्ने तयारी गरिएको आयोगका सूचना अधिकारी सूर्यप्रसाद अर्यालले जानकारी दिए ।
०७४ सालको स्थानीय तह निर्वाचनमा सेतो कागजमा नीलो रङ्गको चुनाव चिन्हहरु थियो भने स्वस्तिक छाप पनि नीलो रङकै थियो । निर्वाचनसम्बन्धी छपाई सामग्रीहरु निर्वाचन प्रचारप्रसार सामग्री, निर्देशिका, फारम आदि छपाइका लागि छापाखानाहरु र सामग्री ढ्वानी व्यवस्थापनका लागि हेलिकोप्टर, ट्रक र कुरियर सेवा लिन सम्बन्धित फर्म संस्थाहरु सूचिकृकरणका लागि सार्वजनिक सूचना गरिएको समेत उनले जानकारी गराए ।
उनका अनुसार स्वस्तिक छाप नीलो रङ्गको हुन्छ । स्वस्तिक छापको चिन्ह र निर्वाचन चिन्हको विभेद प्रष्ट होेस् भनेर प्राविधिक रुपमा सुझाव आएपछि यस्तो निर्णय गरिएको आयोगको भनाई छ । चुनावमा ७२ दलले देशैभरी उम्मेदवारी दिने भएका छन् । उहाँका अनुसार निर्वाचनमा सहभागी हुन आयोगमा दर्ता भएका ८० दलमध्ये ७२ दलले देशभरी उम्मेदवार दिनेगरी निवेदन दर्ता भएको हो ।