काठमाडौं । स्पेनिस ला लिगामा शीर्ष स्थानमा रहेको एट्लेटिको मड्रिड पराजित भएको छ । उसलाई लेभान्टेले नमिठो हार दिलाएको छ । आठौं स्थानमा रहेको लेभान्टेले शीर्ष स्थानमा रहेको एट्लेटिको मड्रिडलाई २-० गोल अन्तरले पराजित गरेको छ । शनिबार राती सम्पन्न खेलमा जितपछि लेभान्टेको ३१ अङ्क भएको छ ।
शीर्ष स्थानमा रहेको एट्लेटिको मड्रिडको ५५ अङ्क छ । एट्लेटिकोको हारले दोस्रो र तेस्रो स्थानमा रहेका रियल मड्रिड र बार्सिलोनालाई भने राहत मिलेको छ । गएराति नै भएको अर्को खेलमा दोस्रो स्थानमा रहेको रियल मड्रिडले रियल भालाडोलिडालाई पराजित गर्दै शीर्ष स्थानको एट्लेटिकोसँग अङ्क दूरी समेत घटाएको छ ।
२१ अङ्कसहित १९ स्थानमा रहेको रियल भालाडोलिडालाई १-० गोलले पराजित गर्दै रियल मड्रिडले दोस्रो स्थान कायम गर्दै ५२ अङ्क बनाएको छ ।