काठमाडौं । अञ्जन विष्टको गोलमा नेपालले मैत्रीपूर्ण फुटबलमा पाकिस्तानमाथि जित निकालेको छ । नेपालले दशरथ रंगशालामा ५० औं खेलको कोशेढुंगालाई सुखद नतिजामा परिणत समेत गरेको छ । नेपाल १–० गोल अन्तरले विजयी भयो । नेपाललाई घरेलु मैदानमा जिताउन अञ्जन विष्टले ८३ औं मिनेटमा गोल गरे । सुनिल बलको पासमा अञ्जनले गोल गरेका हुन् ।
अञ्जनले गत असोजमा दशरथ रंगशालामै भएको बंगलादेश विरुद्धको मैत्रीपूर्ण खेलमा ह्याट्रिक गरेका थिए । यो उनको नेपालका लागि ११ औं गोल हो । अञ्जन नेपालका लागि १३ गोल गर्ने हरि खड्का र निराजन रायमाझीको कीर्तिमान बराबरी गर्नबाट दुई गोलले मात्र टाढा छन् ।