न्यूयोर्क
न्यूयोर्कमा निकै ठुलो संख्यामा कोरोना भाइरस संक्रमित देखिन थालेपछीि एक हजार बेड क्षमताको अमेरिकी सेनाको “हस्पिटल शिप” उपचारका लागि न्यूयोर्क ल्याउने तयारी गरिएको छ । यस अगाडि सन् २००१ को आतंकबादी हमलामा घाईतेहरुको उपचारका लागि प्रयोग गरिएको सेनाको “हस्पिटल शिप” अहिले बिरामीको चाप बढ्न थालेपछि न्यूयोर्कका गभर्नर एन्ड्रु कुमोले राष्ट्रपति डोनाल्ड ट्रम्पसँग मागेका थिए । गभर्नर कुमोको अनुरोधमा राष्ट्रपति ट्रम्पले एक हजार बेडको पानी जहाज पठाउने सहमति जनाएका हुन । जहाजलाई न्युयोर्क हार्बरमा बिरामीहरुको उपचार गरिने तयारी गरिएको छ । सेनाको जहाज न्युयोर्क हार्बरमा उपचारका लागि ल्याउने तयारी गरिए पनि कोरोना भाइरस प्रभावितहरुको उपचारमा भने तत्काल जहाज प्रयोग गरिने छैन तर अन्य रोगका बिरामीहरुलाई भने त्यो जहाजमा राखेर उपचार गरिने छ । जहाज कति दिनमा तयारी अवस्थामा न्युयोर्क हार्बर आई पुग्छ प्रष्ट पारिएको छैन ।
गभर्नर कुमोले भनेका छन् “हामीलाई न्युयोर्कमा ४५ दिन भित्र १ लाख १० हजार बेडको आवश्यकता पर्ने छ । हाल हामीसँग उपचारको लागि जम्मा ५३ हजार बेडहरु र ३७ हजार आई सि यु युनिट मात्र छन् । र ३ हजार मात्र भेन्टिलेटर छन् । “बुधबारसम्म न्युयोर्कमा भाईरस पोजेटिभको संख्या २३ सय पुगेको छ भने १६ को मृत्यु भै सकेको छ । हाल न्युयोर्कमा संक्रमित संख्या मध्ये २३ प्रतिशत मानिस अस्पताल भर्ना भएका छन् । यो संख्या विश्वकै संख्याको दाँजोमा भने निकै धेरै हो । विश्वका अन्य देशहरुमा संक्रमितहरु मध्ये १० प्रतिशत मात्र अस्पातल भर्ना हुने आँकडा छ । अहिले न्युयोर्क राज्यले तयारी गर्दै गरेको १ लाख १० हजार बेडको तयारलाई आधार मान्दा मे महिनाको मध्यसम्म न्युयोर्कमा मात्र ५ लाख मानिस कोरोनाको संक्रमण हुने छन् ।