काठमाडौं । मेलम्ची खानेपानीको परीक्षणका दौरान आज सुन्दरीजलमा पानी खसालिँदैछ । यसरी आएको पानीलाई मेलम्चीको वितरण केन्द्रमा नभई बागमति नदीमा पठाइने छ । यसले नदीको जलप्रवाह बढ्न सक्ने भन्दै मेलम्ची विकास समितिले सतर्क रहन नदी किनारका बासिन्दालाई आह्वान गरेको छ । सुरुङ परीक्षणका क्रममा बागमतीमा नदीमा पानीको सतह घटबढ हुनसक्ने जनाउँदै सजग रहन स्थानीयवासीलाई अपिल गरेको हो ।
फागुन १० गतेदेखि सुरुङ परीक्षणका लागि पानी पठाइएकामा आज सुन्दरीजल आइपुग्ने छ । पानीको केही परिमाण सिधैँ बागमतीमा जाने समितिको भनाई छ । पानीको परिमाण एकै पटक बढ्न सक्ने भएकाले सजग रहन भनिएको हो । आयोजनाका मुख्य पूर्वाधारका रुपमा रहेको सुरुङको निर्माण गत वर्ष सकिएसँगै परीक्षणको काम जारी छ । आज परीक्षणको अवलोकन गर्न प्रधानमन्त्री सुन्दरीजल जाँदैछन् ।