काठमाडौं । सर्वोच्च अदालतले सोमबार दिउँसो एक बजे गरेको फैसला अनुसार नेपाली कांग्रेसका सभापति शेरबहादुर देउवालाई २८ घण्टा भित्र प्रधानमन्त्रीमा नियुक्ति दिनु पर्नेछ । यो समय आज साँझ ५ बजे सकिने भएको छ । राष्ट्रपति कार्यालय अदालतको आदेश कार्यान्वयनको तयारीमा छ । कार्यालय स्रोतका अनुसार देउवा तोकिएको समय अगाडी नै प्रधानमन्त्रीमा नियुक्त हुने छन् । साथै उनलाई आजै सपथ ग्रहण गराउने तयारी समेत छ । सम्भवतः साँझ ५ बजे उनको सपथ हुने छ ।
सर्वोच्च अदालतले सोमबार देउवालाई प्रधानमन्त्री नियुक्त गर्न परमादेश दिएको हो । देउवा नेपालको प्रधानमन्त्रीका रुपमा पाँचौ पटक जिम्मेवारीमा पुग्दैछन् । अत्यधिक बहुमत प्राप्त सरकारको नेतृत्व गरेका ओली भने आफ्नै घमण्ड र सनकका कारण पतन भएपछि जनादेश नपाएपनि देउवा प्रधानमन्त्रीको कुर्सीमा पुग्न लागेका हुन् । देउवाले आजै दलहरुको समन्वयमा मन्त्रिमण्डल गठन गर्नेछन् ।